«Ռեալը» մտադիր է անվճար ձեռք բերել «Բավարիայի» կիսապաշտպանին

Մադրիդի «Ռեալը» ցանկանում է անվճար ձեռք բերել Գերմանիայի չեմպիոն Մյունխենի «Բավարիայի» կիսապաշտպան Կորենտին Տոլիսոյին, հաղորդում է Mundo Deportivo-ն։ Հաջորդ ամռանը կավարտվի ֆրանսիացի ֆուտբոլիստի պայմանագիրը «Բավարիայի» հետ։ Երկարաձգման վերաբերյալ բանակցություններ կողմերը դեռ չեն ունեցել։

Արքայական ակումբը ցանկանում է իրականացնել «Բավարիայի» նախկին պաշտպան, ավստրիացի Դավիդ Ալաբայի տեղափոխության նման գործարք։ Ալաբան եւս չէր երկարաձգել պայմանագիրը «Բավարիայի» հետ՝ իմանալով մադրիդյան թիմի մտադրության մասին։ Նա անցած ամռանն անվճար տեղափոխվեց «Ռեալ»։

27-ամյա Տոլիսոյի ծառայություններով հետաքրքրված են նաեւ Փարիզի ՊՍԺ-ն, Թուրինի «Յուվենտուսը» եւ Լոնդոնի «Տոտենհեմը»։

Տոլիսոն 2017-ին ֆրանսիական «Լիոնից» է տեղափոխվել «Բավարիա» 41,5 միլիոն եվրոյի դիմաց։ Գերմանիայի ընթացիկ առաջնությունում նա մասնակցել է 7 հանդիպման, կատարել 1 գոլային փոխանցում։