Գվարդիոլա․ Հաղթանակը կախված է շատ գործոններից, որոնք չես կարող վերահսկել

Անգլիայի չեմպիոն «Մանչեսթեր Սիթիի» կատալոնացի գլխավոր մարզիչ Խոսեպ Գվարդիոլան համեմատել է իր աշխատանքը անգլիական ակումբում եւ «Բարսելոնայում», որը գլխավորել է 2008-2012 թվականներին։

«Հիմա ես ավելի լավ մարզիչ եմ, քան այն ժամանակ, ավելի շատ փորձ ունեմ, ավելի լավ գիտեմ խաղը։ Ավելի շատ գիտեմ մրցակիցների մասին, նաեւ ինչպես գրոհել եւ պաշտպանվել։ Աղետալի կլիներ, եթե այս տարիների ընթացքում չկատարելագործվեի։

Հիմա ավելի հանգիստ եմ, փորձը թույլ է տալիս։ Ես աշխատում եմ, ջանք չեմ խնայում, եւ եթե չի ստացվում հաղթել, նորից եմ փորձում։ Հաղթանակը կախված է շատ գործոններից, որոնք չես կարող վերահսկել»,- Գվարդիոլայի խոսքը մեջբերում է Sky Sports-ը։

«Մանչեսթեր Սիթին» Գվարդիոլայի ղեկավարությամբ 2016 թվականից 3 անգամ նվաճել է Անգլիայի չեմպիոնի տիտղոսը, 4 անգամ՝ Անգլիական լիգայի գավաթը, 1 անգամ՝ Անգլիայի գավաթը, 2 անգամ՝ Անգլիայի սուպերգավաթը։