Չավին կողմ է Դանի Ալվեսի վերադարձին «Բարսելոնա»

«Բարսելոնայի» նորանշանակ գլխավոր մարզիչ Չավին կողմ է թիմի նախկին պաշտպան Դանի Ալվեսի վերադարձին կատալոնական ակումբ, հաղորդում է Sport.es-ը։

38-ամյա բրազիլացի ֆուտբոլիստն այժմ ակումբ չունի եւ անվճար կմիանա «Բարսելոնային»։ Ալվեսը հայտարարել էր, որ առանց աշխատավարձի էլ պատրաստ է խաղալ նախկին թիմում։ Նա ցանկանում է կարիերան ավարտել «Բարսելոնայում», որի կազմում հանդես է եկել 2008-2016 թվականներին՝ 391 խաղում խփելով 21 գոլ, կատարելով 101 գոլային փոխանցում։

Ալվեսը «Բարսելոնայի» հետ դարձել է Իսպանիայի վեցակի չեմպիոն, Չեմպիոնների լիգայի եռակի գավաթակիր։ Նա ամենատիտղոսակիր ֆուտբոլիստն է պատմության մեջ՝ 42 տիտղոս։

Բրազիլական «Սան Պաուլուի» հետ պայմանագիրը խզելուց հետո Դանի Ալվեսն ունի ազատ գործակալի կարգավիճակ։