Ֆաբիան Ռուիսը հեռացվել է Իսպանիայի հավաքականից վճռական հանդիպումից առաջ

Իտալական «Նապոլիի» կիսապաշտպան Ֆաբիան Ռուիսը հեռացվել է Իսպանիայի հավաքականի Շվեդիայի դեմ աշխարհի առաջնության ընտրական մրցաշարի վերջին տուրի վճռական հանդիպումից առաջ։ Պատճառը ազգային թիմի գլխավոր մարզիչ Լուիս Էնրիկեի հետ վիճաբանությունն է, հաղորդում է football-italia.net-ը։

«Ֆաբիանի հետ ամեն ինչ կարգին է, բայց հայտացուցակում կլինի 25 խաղացող։ Նա նախնական հայտացուցակում է եւ գիտի, թե ինչ պետք է փոխի, որպեսզի վերադառնա հիմնական կազմ։ Բոլոր դռները նրա համար բաց են»,- ասել է Լուիս Էնրիկեն։

Հիշեցնենք, որ նախավերջին տուրում Իսպանիայի հավաքականը 1։0 հաշվով հաղթել է Հունաստանի թիմին։

Իսպանիա - Շվեդիա հանդիպումը տեղի կունենա նոյեմբերի 14–ին։

Իսպանիան 16 միավորով B խմբի առաջատարն է։ Շվեդիան երկրորդ տեղում է՝ 15 միավոր։