«Ռոման» կփորձի ձեռք բերել «Ռեալի» կիսապաշտպանին

Իտալական «Ռոման» սկսել է աշխատել Մադրիդի «Ռեալի» 25-ամյա հարձակողական կիսապաշտպան Դանիել Սեբալյոսի տրանսֆերի ուղղությամբ, հաղորդում է twitter.com/NicoSchira-ն։ Իտալացի Կառլո Անչելոտիի ղեկավարած թիմում խաղաժամանակ չստանալու պատճառով իսպանացի ֆուտբոլիստը ցանկանում է արդեն հունվարին փոխել ակումբը։

«Ռոման» ցանկանում է վարձակալել Դանիել Սեբալյոսին, որի ծառայություններով հետաքրքրված է նաեւ իսպանական «Բետիսը»։

Երկու տարի վարձակալությամբ Լոնդոնի «Արսենալում» հանդես գալուց հետո ամռանը Մադրիդ վերադարձած Սեբալյոսն ընթացիկ մրցաշրջանում դեռ հանդիպում չի անցկացրել Արքայական ակումբում։

Transfermarkt-ը նրա տրանսֆերային արժեքը գնահատում է 20 միլիոն եվրո։ Սեբալյոսի պայմանագիրը «Ռեալի» հետ նախատեսված է մինչեւ 2023թ․ հունիս։