Բենզեմա. Սուր պայքար կլինի եզրափակիչում, ֆուտբոլը կուրախացնի երկրպագուներին

Մադրիդի «Ռեալի» եւ աշխարհի չեմպիոն Ֆրանսիայի հավաքականի հարձակվող Քարիմ Բենզեման Ազգերի լիգայի եզրափակիչում ակնկալում է դիտարժան պայքար։ Դիդյե Դեշամի գլխավորած թիմը տիտղոսը կվիճարկի Իսպանիայի հավաքականի հետ դիմակայությունում։

«Կիսաեզրափակիչում բելգիացիների հետ ստացվեց այս մրցաշրջանի ամենագրավիչ հանդիպումներից մեկը։ Երկու թիմերն էլ կարող էին հասնել հաղթանակի, եւ ինտրիգը պահպանվեց մինչեւ եզրափակիչ սուլիչը։ Հաճելի է մտածել, որ այդ խաղը շատերը հավանեցին։ դա նպաստում է սպորտի զարգացմանը։

Հույս ունեմ, որ եզրափակիչը ոչ պակաս դիտարժան կստացվի։ Վստահ եմ, որ կլինի գերազանց հանդիպում։ Իսպանիան ունի երիտասարդ կազմ, բազմաթիվ տաղանդավոր խաղացողներ։ Կարծում եմ՝ սուր պայքար կլինի, ֆուտբոլը կուրախացնի երկրպագուներին»,- Բենզեմայի խոսքը մեջբերում է AS-ը։

Հիշեցնենք, որ կիսաեզրափակիչում Ֆրանսիայի բելգիացիների նկատմամբ կամային հաղթանակ է տարել 3։2 հաշվով։

Իսպանիա - Ֆրանսիա եզրափակիչը տեղի կունենա հոկտեմբերի 10-ին Միլանում եւ կմեկնարկի Երեւանի ժամանակով 22։45-ին։