Ռոնալդու․ Չեմ սպասում, որ կլինեմ մեկնարկային կազմում «Նյուքասլի» դեմ

12 տարի անց «Մանչեսթեր Յունայթեդ» վերադարձած 36-ամյա պորտուգալացի հարձակվող Կրիշտիանու Ռոնալդուն չի սպասում, որ կմասնակցի «Նյուքասլի» դեմ Անգլիայի առաջնության չորրորդ տուրի հանդիպմանը, սակայն կատակել է, որ ճնշում կգործադրի մանչեսթերյան թիմի նորվեգացի գլխավոր մարզիչ Ուլե-Գունար Սուլշերի նկատմամբ, որպեսզի ընդգրկվի մեկնարկային կազմում։

«Չեմ սպասում, որ կլինեմ մեկնարկային կազմում կամ ընդհանրապես կմասնակցեմ «Նյուքասլի» դեմ խաղին։ Իհարկե, շաբաթ օրը ես կնյարդայնանամ, բայց ես արդեն հասուն եւ փորձառու ֆուտբոլիստ եմ եւ կլինեմ պատրաստ։

Մտադիր եմ ճնշում գործադրել Սուլշերի վրա, որպեսզի նա ինձ խաղադաշտ դուրս բերի մեկնարկային կազմում (ծիծաղում է)։ Ես պատրաստ եմ»,- Ռոնալդուի խոսքը մեջբերում է «Մանչեսթեր Յունայթեդի» պաշտոնական կայքը։

«Մանչեսթեր Յունայթեդ» - «Նյուքասլ» հանդիպումը տեղի կունենա սեպտեմբերի 11-ին եւ կմեկնարկի Երեւանի ժամանակով 18։00-ին։