«Դադիվանքի հարցը մնացել է նույնը, ադրբեջանական կողմը որևէ պատճառաբանություն չունի, թե ինչու է արգելում». Արցախի թեմի առաջնորդ
Մայիս ամսից Ադրբեջանն առանց որևէ հստակ բացատրության հայկական կողմին արգելել է Դադիվանք ուխտավորներ ուղարկել, թեև նոյեմբերի 25-ին Արցախի Քարվաճառի շրջանը հանձնելուց հետո, Ադրբեջանի հետ համաձայնություն ձեռք բերվեց, որ Դադիվանքում մնալու են հայ հոգևորականները, և յուրաքանչյուր կիրակի հայ ուխտավորները հնարավորություն կունենան այցելելու այնտեղ՝ մասնակցելու պատարագներին։ Մի քանի ամիս պատարագներին մասնակցելուց հետո, ուխտավորները զրկվեցին այդ հնարավորությունից։
168.am-ն Արցախի թեմի առաջնորդ Գերաշնորհ Տ․Վրթանես եպիսկոպոս Աբրահամյանից հետաքրքրվեց՝ արդյոք այս հարցը որևէ լուծում ստացե՞լ է, և ռուսական կողմից ինչպե՞ս են այս ամենին արձագանքում։
«Դադիվանքի հարցը մնացել է նույնը, առանց որևէ փոփոխության, ինչպես կար 1-2 ամիս առաջ, նույնը շարունակվում է։ Դադիվանքում գտնվող մեր հոգևորականների համար սնունդը փոխանցում ենք, ադրբեջանական կողմը որևէ պատճառաբանություն չունի, թե ինչու է արգելում։ Կարծեմ՝ ռուսական կողմը հրամկազմում փոփոխություններ է անում, այդ պատճառով էլ սպասում ենք, որպեսզի նոր կազմի հետ հասկանանք, թե այս հարցերն ինչպես կարող ենք կարգավորել։
Դադիվանքում ամեն ինչ նույնն է՝ հայ հոգևորականները պատարագները մատուցում են, բայց առանց հայ ուխտավորների։ Եթե հոգևորականները գործեր ունեն, կարողանում ենք նրանց մեկ շաբաթով բերել, այդ գործերն անեն, նորից վերադառնան։ Անձամբ ես չեմ կարողանում գնալ Դադիվանք»,- նշեց Արցախի թեմի առաջնորդը։
Նա հավատում է, նաև աղոթում է աստծուն, որպեսզի հայ ուխտավորները կարողանան այցելել Դադիվանք։
«Այս ամենին հասնելու համար պետք է կարողանանք յուրաքանչյուրս ամեն ինչ անել, որպեսզի Դադիվանքի հետագա ճակատագիրը չմնա միայն խաղաղապահներով ու հոգևորականներով, այլ մշտապես այնտեղ ներկա լինեն ուխտավորներ, հաղորդություն լինի, աղոթք հնչի, ինչպես ընդունված է մեր բոլոր վանքերում։ Ես հուսով եմ»,- հավելեց նա։
Անդրադառնալով Շուշիի Սուրբ Ղազանչեցոց եկեղեցուն, Գերաշնորհ Տ․Վրթանես եպիսկոպոս Աբրահամյանն ասաց, որ եկեղեցու վեղարը չկա, այն ամբողջությամբ փաթաթել են կանաչ ցելոֆանով, առհասարակ այն չորս կողմից փաթաթել են ցելոֆանով։
«Հայկական, քրիստոնեական հետքեր կան, որոնք ծածկում են, թե եկեղեցու ներսում ինչ է կատարվում՝ տեղյակ չենք, բայց նրանք, անշուշտ, ամեն ինչ պետք է վերացնեն։ Հետագա ճակատագրի մասին տեղյակ չեմ, չգիտեմ, թե այն ինչի պետք է վերածեն, լավագույնս եթե պահպանեն՝ որպես եկեղեցի, ինչ-որ չափով տանելի է, եթե վերածեն մզկիթի կամ առհասարակ վերացնեն, արդեն այլ ծրագիր է իրենց կողմից իրականացվելու»,- եզրափակեց Արցախի թեմի առաջնորդը։
Իրանի դեմ հարվածների ֆոնին ՀԱԵ Ատրպատականի թեմը դադարեցրել է եկեղեցական արարողությունները
Եվրախորհրդարանի պատգամավորները չեն կարողացել աշխարհի քարտեզի վրա գտնել Իրանը
Հայաստանն ու Իրանն աշխատում են սահմանին երկրորդ կամրջի նախագծի վրա
Իրանի հարստացված ուրանի պաշարները միջուկային օբյեկտների փլատակներում են
Եվրամիությունը չի հասկանում Իրանում պատերազմի նպատակները. Կալաս
Անկանխիկ ստացման եղանակի անցնելու դիմում չներկայացրած կենսաթոշակառուի համար բանկը ընտրել է ՄՍԾ-ն՝ ին...
Լարիջանիի սպանությունից հետո Իրանը կասետային ռումբերով հարվածել է Թել Ավիվին
ԱԹՍ-ի հարվածի հետևանքով Դուբայի միջազգային օդանավակայանի մոտ հրդեհ է բռնկել
Երևանում և մարզերում կլինեն էլեկտրաէներգիայի ընդհատումներ
ԱՄԷ նախագահն ու Սաուդյան Արաբիայի թագաժառանգը քննարկել են տարածաշրջանային զարգացումները