Իտալիային մեկ խաղ է բաժանում համաշխարհային ռեկորդից, Մանչինին գերազանցեց Լիպիի ցուցանիշը

Եվրոպայի գործող չեմպիոն Իտալիայի հավաքականը, ֆուտբոլի աշխարհի առաջնության ընտրական փուլի եվրոպական գոտու մրցաշարի չորրորդ տուրում Ֆլորենցիայում ոչ ոքի խաղալով բուլղարացիների հետ (1:1), բոլոր մրցաշարերում անպարտելի շարքը հասցրել է 35 հանդիպման:

Իտալացիները կրկնել են Իսպանիայի հավաքականի ցուցանիշը: 2007-2009-ը Իսպանիայի հավաքականը ևս չէր պարտվել 35 խաղ անընդմեջ, հայտնում է Gracenote Live-ը:

Անպարտելի շարքի համաշխարհային ռեկորդը պատկանում է Բրազիլիայի հավաքականին, որը 1993-1996-ը պարտություն չի կրել 36 հանդիպումներում:

Ռոբերտո Մանչինին Իտալիայի հավաքականի առաջին մարզիչն է, որն անպարտելի է 18 տնային խաղերում անընդմեջ: Իտալացի մասնագետը մեկ խաղով գերազանցել է Մարչելո Լիպիի ռեկորդը:

ԱԱ-2022-ի ընտրական փուլի հաջորդ խաղում Իտալիայի հավաքականը սեպտեմբերի 5-ին կհյուրընկալվի Շվեյցարիայի հավաքականին: