Շվարց. Զարմանալի չէ, որ Զախարյանն այժմ Եվրոպայի լավագույն ակումբների թիրախում է

Մոսկվայի «Դինամոյի» գերմանացի գլխավոր մարզիչ Սանդրո Շվարցը մեկնաբանել է լուրերը, թե Եվրոպայի մի շարք առաջատար ակումբներ հետաքրքրված են ռուսական ակումբի 18-ամյա ռուսաստանցի կիսապաշտպան Արսեն Զախարյանի ծառայություններով։

«Հաշվի առնելով այս տարիքում Զախարյանի ցուցադրած խաղամակարդակը՝ զարմանալի չէ, որ նա Եվրոպայի լավագույն ակումբների սկաուտների թիրախում է։ Ես շատ եմ խոսում Արսենի հետ եւ չունեմ մտավախություն, որ նա որոշում կընդունի հիմա հեռանալ «Դինամոյից»։

Արսենը դեռ պետք է առաջադիմի։ Պետք է ավելի կայուն լինի։ Նա դեռ առաջին լիարժեք մրցաշրջանն է անցկացնում կարիերայում։ Այդ մասին նույնպես պետք է հիշել։

Ռուսաստանի հավաքականի գլխավոր մարզիչը ներկա էր ԲԿՄԱ-ի հետ մեր հանդիպմանը, նա տեսել է Արսենի խաղը։ Հավաքականում նրան ընդգրկելու որոշումն ընդունելու է Կարպինը։ Ես չեմ կարող մեկնաբանել Ռուսաստանի հավաքականի կազմը»,- Շվարցի խոսքը մեջբերում է Sport24.ru-ն։

Ռուսական մամուլը գրել էր, որ Արսեն Զախարյանի ծառայություններով հետաքրքրված են գերմանական «Լայպցիգը» եւ Լոնդոնի «Չելսին»: Ավելի վաղ նշվում էր, որ 2 ակումբները պատրաստ են ակտիվացնել ռուսաստանցի ֆուտբոլիստի պայմանագրում նշված 12 միլիոն եվրո հրաժարագնի կետը։