Մեսին պատմել է, թե ինչու է ընտրել 30 համարի մարզաշապիկը

Ֆրանսիական ՊՍԺ-ի նորեկ, արգենտինացի հարձակվող Լիոնել Մեսին պատմել է, թե ինչու է ընտրել 30 համարի մարազաշապիկը:

«30 համարն ինձ համար առաջինն է եղել «Բարսելոնայում»: Այսքան տարիներ անց տեղափոխվելով ՊՍԺ՝ ես դարձյալ ունեմ իմ կյանքում նոր բանի զգացողություն»,- արգենտինացի հարձակվողի խոսքը մեջբերում է ՊՍԺ-ի մամուլի ծառայությունը:

Հատկանշական է, որ ֆրանսիական Լիգա-1-ում 30 համարը նախատեսված է միայն դարպասապահների համար, սակայն լիգայի ղեկավարությունը որոշել է ընդառաջել ՊՍԺ-ին:

Հիշեցնենք, որ արգենտինացի հարձակվողն օգոստոսի 10-ին փարիզյան ակումբի հետ կնքել է 2 տարվա պայմանագիր, որն ունի ևս մեկ տարով երկարաձգելու հնարավորություն:

34-ամյա ֆուտբոլիստի պայմանագիրը կատալոնական «Բարսելոնայի» հետ ավարտվել էր հուլիսի 1-ին, ինչից հետո նա ստացել էր ազատ գործակալի կարգավիճակ: Լիոնել Մեսին 2005 թվականից էր հանդես գալիս «Բարսելոնայի» գլխավոր թիմում, որի կազմում անցկացրել է 778 հանդիպում, դարձել 672 գոլի ու 305 գոլային փոխանցման հեղինակ, նվաճել 35 տիտղոս: