Աբրամովիչը 175 միլիոն եվրո է տրամադրել Հոլանդի տրանսֆերին, «Բորուսիան» մերժել է

Լոնդոնի «Չելսիի» սեփականատեր Ռոման Աբրամովիչը 175 միլիոն եվրո է հատկացրել Դորտմունդի «Բորուսիայի» եւ Նորվեգիայի հավաքականի հարձակվող Էրլինգ Հոլանդի տրանսֆերին, սակայն գերմանական ակումբը ցանկանում է հաջորդ մրցաշրջանում էլ իր կազմում տեսնել 20-ամյա հարձակվողին, հաղորդում է ESPN-ը։

Եթե գործարքը տեղի ունենա, Հոլանդի տրանսֆերը կդառնա երկրորդ ամենաթանկը ֆուտբոլի պատմության մեջ։ Առաջին տեղում բրազիլացի հարձակվող Նեյմարի տրանսֆերն է «Բարսելոնայից» ՊՍԺ՝ 222 միլիոն եվրո։

Transfermarkt-ը Հոլանդի տրանսֆերային արժեքը գնահատում է 110 միլիոն եվրո։ Նրան ձեռք բերելու մտադրություն ունեն նաեւ «Բարսելոնան» եւ Մադրիդի «Ռեալը»։

Հոլանդը 2020թ․ հունվարին է ավստրիական «ՌԲ Զալցբուրգից» տեղափոխվել Դորտմուդ։ Նրա պայմանագիրը «Բորուսիայի» հետ նախատեսված է մինչեւ 2024թ․ հունիս։