Շուշին Ալիևի կողմից Ադրբեջանի մշակութային մայրաքաղաք հռչակելը ՀՀ իշխանությունների սխալների արդյունքն է

Այն ցավալի իրադարձությունները, որոնք տեղի են ունենում այսօր, Հայաստանի իշխանությունների՝ ինչպես պատերազմի ընթացքում, այնպես էլ դրանից հետո անհետևողական ու հանցավոր արարքների արդյունքն է: Այս մասին Tert.am-ի հետ զրույցում նշեց «Հայացք» վերլուծական կենտրոնի փորձագետ Արփինե Մելիքյանն՝ անդրադառնալով «Շուշի քաղաքը Ադրբեջանի մշակութային մայրաքաղաք հռչակելու մասին» Ալիևի ստորագրած հրամանագրին:

«Չհանդիպելով որևէ լուրջ հակազդեցության Հայաստանի իշխանությունների կողմից` Ադրբեջանը բավականին մեծ տեմպերով առաջ է տանում իր օրակարգը և հաջողություն գրանցում իր համար ցանկալի բոլոր հարցերում: Այսպիսի հարցերից մեկն էլ Շուշի քաղաքը որպես Ադրբեջանի մշակութային մայրաքաղաք հռչակելու մասին որոշումն է, որում ի դեպ նշվում է նաև, որ «անհրաժեշտ է վերականգնել Շուշիի «պատմական ադրբեջանական» տեսքը»»,-նշեց փորձագետը:

Նրա խոսքով՝ այս որոշումը, սակայն, իրականում անսպասելի չէր:

«Շուշին ադրբեջանական մայրաքաղաք դարձնելու և նրա, այսպես կոչված, պատմական տեսքը վերականգնելու մասին Ադրբեջանը, ինչպես նաև Թուրքիան սկսել են բարձրաձայնել 44-օրյա պատերազմից անմիջապես հետո: Եվ ոչ միայն այդ երկու պետությունները: Թյուրքալեզու երկրների համագործակցության խորհրդի կողմից, որի կազմի մեջ են մտնում ինչպես Թուրքիան ու Ադրբեջանը, այնպես էլ Ղրղզստանը, Ղազախստանը, Ուզբեկստանն այս տարվա սկզբից պարբերաբար առաջարկ է հղվում Ադրբեջանին 2022 թվականին Շուշի քաղաքը նաև հռչակել թյուրքական աշխարհի մշակութային մայրաքաղաք»,- ասաց Մելիքյանը:

Սակայն, նրա խոսքով, ՀՀ իշխանությունների կողմից այս հարցերից բխող ռիսկերը նվազեցնելու ուղղությամբ մինչ օրս հստակ քայլեր չեն իրականացվել՝ առնվազն հայկական պատմամշակութային հուշակոթողներն ու պաշտամունքի վայրերը պահպանելու տեսանկյունից:

«Ընդհակառակը, վերջին ամիսներին ականատես ենք դարձել միայն Հայաստանի բարձր ամբիոններից Շուշի քաղաքի վերաբերյալ տարբեր աբսուրդային հայտարարությունների ու մեկնաբանությունների, որոնք հնչել են ամենաբարձր մակարդակով: Հստակ մշակված քայլերով Ադրբեջանին չհակազդելը, ավելին՝ հանցավոր հայտարարություններով հակառակորդի ջրաղացին ջուր լցնելը, այսօր հասցրել են այն կետին, որ կանգնած ենք Շուշիում հայկական հետքն ամբողջությամբ կորցնելու եզրին: Եվ ոչ միայն Շուշիում, այլ Արցախի՝ Ադրբեջանի տիրապետության տակ անցած ողջ հատվածում: Ասվածի վառ ապացույցն էլ Ջրականի հայկական եկեղեցու ավերումն ու Շուշիի Սուրբ Ամենափրկիչ Ղազանչեցոց Մայր տաճարում Ադրբեջանի կողմից իրականացվող գործողություններն են, որով վերջինս շինաշխատանքների անվան տակ եկեղեցու տեսքի փոփոխման աշխատանքներ է կատարում»,- ասաց փորձագետը:

Նրա խոսքով՝ Ադրբեջանը Հայաստանի լռությունն ու ոչ մի հարցին չմիջամտելն օգտագործում է Արցախում իր ախորժակն էլ ավելի բավարարելու համար:

«Քննադատող հայտարարությունները հարցի լուծում չեն: Քանի դեռ Հայաստանի կողմից չկա մշակված գործողությունների ծրագիր ու լուրջ հակազդեցություն, Ադրբեջանի այս պահվածքը շարունակական բնույթ է կրելու»,- հավելեց փորձագետը: