«Բավարիայի» երկրպագուները սկսել են ստորագրահավաք. Պահպանել Ֆլիկին ու հեռացնել Սալիհամիջիչին

Մյունխենի «Բավարիայի» երկրպագուները սկսել են ստորագրահավաք՝ ակումբի ղեկավարությունից պահանջելով համոզել թիմի գլխավոր մարզիչ Հանս-Դիտեր Ֆլիկին շարունակել աշխատանքը:

Մեկ օրում հավաքվել է 21 հազարից ավելի ստորագրություն: Երկրպագուները նաև պահանջում են հեռացնել «Բավարիայի» մարզական տնօրեն Հասան Սալիհամիջիչին, որը կոնֆլիկտ ունի գերմանացի մասնագետի հետ:

Ապրիլի 17-ին Հանս-Դիտեր Ֆլիկը հայտարարել էր, որ այս մրցաշրջանի վերջում կհեռանա զբաղեցրած պաշտոնից։ Սպասվում է, որ ամռանը նա կգլխավորի Գերմանիայի հավաքականը՝ փոխարինելով Յոահիմ Լյովին։

Ֆլիկը «Բավարիան» գլխավորում է 2019թ․ նոյեմբերից։ Նրա ղեկավարությամբ թիմը դարձել է Գերմանիայի չեմպիոն, գավաթակիր, սուպերգավաթակիր, Չեմպիոնների լիգայի հաղթող, Եվրոպայի սուպերգավաթակիր, աշխարհի ակումբային չեմպիոն։