Զիդան. Հաղթահարեցինք լիվերպուլյան փոթորիկը և կարող ենք հպարտանալ դրանով

Մադրիդի «Ռեալի» ֆրանսիացի գլխավոր մարզիչ Զինեդին Զիդանն անդրադարձել է Չեմպիոնների լիգայի քառորդ եզրափակիչի պատասխան խաղում Անգլիայի չեմպիոն «Լիվերպուլի» հետ գոլազուրկ ոչ ոքիին, որի արդյունքում Արքայական ակումբն անցավ հաջորդ փուլ:

«Հասկանում էինք, որ պետք է համբերենք այսօր, սակայն ստացանք այն, ինչ ցանկանում էինք: Կարծում եմ՝ լավ գործեցինք ստեղծված իրավիճակում: Հաղթահարեցինք լիվերպուլյան փոթորիկը և կարող ենք հպարտանալ դրանով: Գիտեինք, որ մրցակիցը շատ կտրուկ է սկսելու: Մեկնարկային 15 րոպեներին նրանք շատ լավն էին: Չեմպիոնների լիգայի քառորդ եզրափակիչում երբեմն անհրաժեշտ է լինում փակվել պաշտպանությունում: Մենք արեցինք դա և անցանք հաջորդ փուլ:

Մենք լավ խաղացինք, բայց, եթե չես իրացնում քո պահերը, ապա կարող ես պատժվել: Միայն ձգտումը բավական չեղավ այսօր»,- Զիդանի խոսքը մեջբերում է Marca-ն:

Հիշեցնենք, որ առաջին խաղում «Ռեալը» հաղթել էր 3:1 հաշվով: Կիսաեզրափակիչում մադրիդցիների մրցակիցը կլինի Լոնդոնի «Չելսին», որը պայքարից դուրս թողեց պորտուգալական «Պորոտին»: