«Մենք կորցրել ենք մեր ամբողջ ռեզերվը «Լալա Լագիի (Լելե Թեփե) օպերացիայի» պատճառով, պլանը բանավոր հաստատել է Փաշինյանը». Մովսես Հակոբյան. (տեսանյութ)

Այսօր մամուլի ասուլիսի ժամանակ ԳՇ նախկին պետ Մովսես Հակոբյանը՝ լրագրողի հարցին ի պատասխան, անդրադառնալով մամուլում տարածված այն տեղեկությանը, թե Նիկոլ Փաշինյանը հրահանգել է ամեն գնով վերադարձնել Ապրիլյան պատերազմի ժամանակ կորցրած տարածքները, ասաց, որ ինքն այդ օպերացիայի կատարման ընթացքում այնտեղ չի եղել:

«Դրա մասին հայտարարել է Սամվել Բաբայանը, լրատվամիջոցներում դա հայտնի է՝ որպես «Լալա Լագիի (Լելե Թեփե) օպերացիա»: Կոնկրետ այդ օպերացիայի ժամանակ ես այնտեղ չեմ եղել, այսքան ժամանակվա իմ վերլուծությունը ցույց է տալիս, որ ինձ Արցախից հանելու պատճառը եղել է հենց այդ օպերացիայի իրականացումը: Այդպիսի մի քանի օպերացիաներ փորձել են պլանավորել, ես կանխել եմ, այդպիսի մի քանի «ավանտյուրա» փորձել են իրականացնել, ես գտել եմ ոչ նպատակահարմար, և հրամանատարությունը լսել է ինձ, և ինձ Արցախից հանելուց ընդամենը մեկ օր հետո այդ օպերացիան պլանավորվում է, և երկրի վարչապետը գնում է այնտեղ, բանավոր հաստատում է այդ պլանը, և սկսում են կիրառել, որի արդյունքում մենք կորցնում ենք մեր ամբողջ ռեզերվը, և բանակի հրամանատարությունը հարավային դարպասում այլևս հնարավորություն չի ունենում մխրճված հակառակորդին կանգնեցնելու: Սա իմ տեսակետն է»,- ասաց Հակոբյանը և ավելացրեց, որ ինքը գիտի՝ եղել են ընդդիմացողներ, թե ոչ, սակայն այժմ փակագծեր չի բացի: