Կուման. «Բարսելոնան» շատ լավն էր այս խաղում

Կատալոնական «Բարսելոնայի» գլխավոր մարզիչ Ռոնալդ Կումանը մեկնաբանել է Իսպանիայի առաջնության 21-րդ տուրում Բիլբաոյի «Աթլետիկի» նկատմամբ հաղթանակը 2:1 հաշվով:

«Բարդ հանդիպում էր ուժեղ մրցակցի դեմ: «Բարսելոնան» շատ լավն էր՝ հատկապես առաջին խաղակեսում: Արժանի էինք խփել ավելի շատ գոլեր: Կարծում եմ՝ արդարացիորեն հաղթեցինք:

Մենք միշտ խոսում ենք գոլերի մասին: Պետք է հարվածներ կատարենք նաև հեռու տարածությունից: Դա քննադատություն չէ, սակայն պետք է հաղթահարենք նաև այդ պահը»,- հոլանդացի մասնագետի խոսքը մեջբերում է Marca-ն:

Հիշեցնենք, որ այդ հաղթանակից հետո «Բարսելոնան» 40 միավորով հավասարվեց Մադրիդի «Ռեալին» եւ գոլերի տարբերությամբ բարձրացավ երկրորդ տեղ։ Առաջատարը Մադրիդի «Աթլետիկոն» է, որը 19 խաղում վաստակել է 50 միավոր։