Իշ­խանությունը չի պատկերացնում պաշտպանական համակարգում մեր ունեցած խնդիրներն ու անելիքները

«Առավոտը» գրում է․  

«Մենք խոսում ենք տեղակալների մասին, սակայն նույնը, որոշ վերապահումներով, կարելի է ասել նաև պաշտպանության նախարարի մասին, ով արդեն 2 ամիս է՝ նախարար է, սակայն անհաղորդ է իր ոլորտում տեղի ունեցող գործընթացներին և առ այս պա­հը չի ձևակերպել իր առաջնահերթությունների և քայլերի մասին»,- «Առավոտը» զրուցել է «Հենակետ» վերլուծա­կան կենտրոնի ղեկավար, Արցախի նա­խագահի նախկին խորհրդական Տիգրան Աբրահամյանը:

Ներկայացնում ենք հատված․

-Պաշտպանության նախարարությունում վերջերս բավական ուշագրավ կադրային փոփոխություններ եղան, նախարարի եր­կու տեղակալ նշանակվեց, որոնք, մեղմ ասած, ոլորտի հետ կապ չունեցող մարդիկ են, նրանցից մեկը նույնիսկ խոստովանեց՝ չգիտե, թե որ ոլորտն է հա­մակարգելու, նաև նախարարի նոր խորհրդական նշանակվեց: Ի՞նչ են հուշ­ում այդ փոփոխությունները:

- Այս նշանակումները հուշում են, որ իշ­խանությունը առհասարակ չի պատկերացնում պաշտպանական համակարգում մեր ունեցած խնդիրների և անելիքների մասին: Իհարկե, կա նաև երկրորդ տար­բերակը․ գիտակցված ձևով համակարգը տանում է արժեզրկման և ոչնչացման ճանապարհով:

Մենք խոսում ենք տեղակալների մասին, սակայն նույնը, որոշ վերապահումներով, կարելի է ասել նաև պաշտպանության նախարարի մասին, ով արդեն 2 ամիս է՝ նախարար է, սակայն անհաղորդ է իր ոլորտում տեղի ունեցող գործընթացներին և առ այս պահը չի ձևակերպել իր առաջնահերթությունների և քայլերի մա­սին:

-Ակնհայտ է, որ հետպատերազմյան շր­ջանում բանակը պետք է վերակազմավոր­վի, վերակառուցվի, շատ հարցեր նորովի մոտեցումներ և լուծումներ են պահանջե­լու: Ձեր կարծիքով՝ արդեն իսկ կարելի՞ է հետևություններ և վերլուծություններ անել ՝ զարգացման, վերակազմավորման ի՞նչ ուղղություն, մեթոդներ և մոտեցում­ներ են որդեգրելու հայկական զինված ու­ժերը, որ սպասվելիք մարտահրավերներից նվազագույն կորուստներով դուրս գանք, մանավանդ, կրած խայտառակ պարտու­թյունից հետո:

- Այն, որ բանակը վերակառուցման կա­րիք ունի, ակնհայտ է նույնիսկ ոչ մասնա­գետների համար, այլ հարց է, որ կառա­վարությունը հետպատերազմյան փուլում չի ձևակերպվել իր խնդիրները, ըստ այդմ՝ դեռ պարզ չէ, թե ինչպես է զինված ուժե­րում տեղի ունենալու բարեփոխումների, ես կասեի՝ արմատական փոփոխությունների գործընթացը:

Չեմ տեսնում այն ներուժը, չեմ տեսնում այն անհատներին, ովքեր համակարգում բարձր պաշտոն են զբաղեցնում և ի վի­ճակի են ստեղծված ծանր իրավիճակում լուրջ խնդիրներ լուծել: Ե՛վ իշխանությունը, և՛ այս պահին Պաշտպանության նախա­րարության ղեկավար կազմը՝ նախարար, տեղակալներ, նույնիսկ մեծ ցանկության դեպքում, ի զորու չեն լինելու ապահովելու արդյունավետության այնպիսի մակար­դակ, ինչն այս պահին անհրաժեշտ է:

-Առհասարակ, հետպատերազմյան ժամանակաշրջանը ի՞նչ ցույց տվեց, ի՞նչ խնդիր էր դրված մեր զինված ուժերի առջև:

-Բոլոր ժամանակներին դրվող գլ­խավոր խնդիրը Հայաստանի, Արցա­խի և առհասարակ հայի անվտան­գության ապահովումն է, իսկ այս պատերազմը ցույց տվեց, որ իշխանությունները ամենատարբեր մակար­դակներում ոչ միայն լուրջ մոտեցում չեն ցուցաբերել անվտանգային սպառնալիքների նկատմամբ, այլ դրանց դրսևորվելու պայմաններում անհրաժեշտ քայլեր չեն ձեռնարկել:

Տարածաշրջանում իրադրության կտրուկ փոփոխություններ են տեղի ու­նեցել, ցավոք, մեր տարածքային ամ­բողջականության, մեծաթիվ կո­րուստների և մեր ազգային շահերի հաշվին: Սակայն մենք իրավունք չունենք համակերպվելու ստեղծված իրադրության հետ, որովհետև դա տար­բեր ժամանակային կտրվածքներով բերե­լու է նոր կորուստների: Պետք է ոտքի կանգնել, հասկանալ, ուսումնասիրել, մշա­կել ու ձևակերպել մեր խնդիրը ու գնալ դրա լուծումներին:

Մանրամասները՝ թերթի այսօրվա համարում: