Հունաստանը դուրս կգա Եվրամիության այսպես կոչված ուժեղացված հսկողության համակարգից

Հունաստանը օգոստոսի 20-ին դուրս կգա Եվրամիության այսպես կոչված ուժեղացված հսկողության համակարգից, ինչը երկրին տնտեսական քաղաքականություն իրականացնելու ավելի շատ ազատություն կտա, տեղեկացրել է Reuters-ը։

Հունաստանի տնտեսական վիճակը եւ քաղաքականությունը հսկվում են այդ կառույցի կողմից 2018-ից, այն բանից հետո, երբ Աթենքը դուրս եկավ Եվրամիության եւ ԱՄՀ-ի ավելի քան 260 մլրդ եվրոյի ֆինանսական օգնության միջազգային երեք ծրագրերից 2010-2015թթ.-ի համար։

«12 տարի անց... դժվար էջը մեր երկրի համար մոտենում է փակվելուն»,- ասել է ֆինանսների նախարար Խրիստոս Ստայկուրասը։ «Հունաստանը վերադառնում է եվրոպական նորմալ վիճակի եւ այլեւս բացառություն չի լինի եվրագոտում»։

Նա ավելացրել է, որ Աթենքը կատարել է քաղաքական պարտավորությունների եւ բարեփոխումների մեծ մասը, որոնք խոստացել էր, եւ ելքը համակարգից օգոստոսի 20-ին հաստատվել է Եվրահանձնաժողովի փոխնախագահ Վալդիս Դոմբրովսկիսի ու տնտեսության գծով եվրահանձնակատար Պաոլո Ջենթիլոնիի նամակով։

Հունաստանի դուրս գալը ուժեղացված հսկոության համակարգից կնշանակի տնտեսական քաղաքականություն վարելու ավելի շատ ազատություն եւ կմոտեցնի երկրի «ներդրումային մակարդակի» կարգավիճակը վերականգնելու նպատակի իրականացումը։

Հսկողության համակարգը նախատեսված էր տնտեսական դժվարությունների պոտենցիալ աղբյուրները վերացնելու եւ կառուցվածքային բարեփոխումներին ուղղված միջոցների մշտական ընդունման ապահովման համար՝ կայուն տնտեսական աճ ապահովելու նպատակով։