Այդ մարդիկ մնացել են ամերիկյան ֆիլմերի տպավորության տակ

Հարցազրույց Ռոբերտ Քոչարյանի փաստաբանական խմբի անդամ Հայկ Ալումյանի հետ

- Պարոն Ալումյան, Մարտի 1-ի գործով տուժածների իրավահաջորդների ներկայացուցիչները հայտարարեցին, որ այլեւս չեն մասնակցի այդ ֆարսին։ Ձեր տեսակետը՝ որպես Ռոբերտ Քոչարյանի պաշտպանական թիմի անդամ։

- Տուժողներ, տուժող այս գործով լինել չեն կարող։ Եվ ընդհանրապես՝ բոլորը, ովքեր տուժել են Մարտի 1-ի իրադարձությունների ընթացքում, նրանք տուժող են այն հիմնական գործի շրջանակներում, որը քննվում է Հատուկ քննչական ծառայությունում եւ որը վերաբերում է մարմնական վնասվածքներին ու սպանություններին։ Այսինքն՝ այդ գործն է, որ քննվում է․․․

- Նկատի ունեմ զոհերի իրավահաջորդներին։

- Ես էլ զոհերի իրավահաջորդներին նկատի ունեմ, բայց Սեդա Սաֆարյանը մարմնական վնասվածք ստացած անձանց շահերի ներկայացուցիչ է։ Ես միայն զոհերին նկատի ունեմ, Մարտի 1-ի սպանություններն այստեղ չեն քննվում։ Քննվում է ՀՔԾ-ում, եւ այնտեղ իրենք պետք է լինեն տուժող եւ այնտեղ էլ հենց տուժողի իրավահաջորդ են։ Էս գործով իրենք ընդհանրապես որպես տուժող կամ տուժողի իրավահաջորդ չպիտի լինեին։

- Այնուամենայնիվ, շրջադարձ տեղի ունեցավ։ Հիմա Ձեզ մեղավոր չե՞ք զգում, որ Ձեր անվերջանալի միջնորդություններով բուն դատաքննությունը չի սկսվում։ Դուք այդ հարցին, իհարկե, անդրադարձել եք, ասել եք, որ բոլոր ընթացակարգերը պետք է պահպանվեն՝ հետագայում ՄԻԵԴ դիմելու համար։

- Իսկ ո՞վ ասաց, որ մեր միջնորդություններն անվերջանալի են։ Եթե գումարեք իրար, կարող է մի 6 հատ միջնորդություն լինի։

- Փաստ է, որ բուն դատավարությունը մինչեւ հիմա չի սկսվել։

- Բուն դատավարությունը վաղուց է սկսվել, անցած տարվա սեպտեմբերից։ Ուղղակի ոչ բոլորն են նկատել դա։ Քրեական դատավարությունում «բուն դատավարություն»՝ նման բառակապակցություն չկա, բայց դատավարությունն այսպես է լինում․ ամերիկյան ֆիլմերում երբ մարդիկ դատավարություններ են տեսնում եւ այդպես են պատկերացնում, դրանցում էն մյուս մասն է, էն հիմնական մասը չի ցուցադրվում։ Այ, էն մասը, որ Ձեզ համար ձանձրալի է, որ նայում եք։
Բայց իրականության մեջ ցանկացած դեպքում այդ Ձեզ համար ձանձրալի հատվածն առկա է լինում ցանկացած դատավարության ժամանակ։ Օրենքն էլ հենց այդպես է նախատեսել, որ մինչեւ ապացույցները հետազոտվեն, դատավարությունը բաղկացած է լինում մի փուլից, երբ միջնորդություններ են քննարկվում։ Եվ մարդկանց մոտ դատավարությունը զուտ հետաքրքրաշարժ դարձնելու համար մենք չենք պատրաստվում մեր միջնորդություններից հրաժարվել։ Էս փուլը հենց միջնորդություններ ներկայացնելու համար է նախատեսված։ Ես զարմանում եմ՝ բա էս փուլում, որը նախատեսված է միջնորդություններ ներկայացնելու համար, ի՞նչ պիտի անենք։

- Դե, մարդիկ ասում են՝ ձգձգվում է, Դանիբեկյանն էլ 2 ամսով գնաց, չեկավ։

- Դանիբեկյանին հարցրեք, թե ինչու չեկավ։ 2 ամիս չէ՝ ավել։

- Հետո՝ «տասը տարի պայքարեցինք, սպասեցինք, որ իշխանություն փոխվի, հիմա էլ սենց տեղում դոփում է»։

- Դա քաղաքական գնահատական է, որ սպասել են իշխանություն փոխվելուն։ Չեմ կարող սա մեկնաբանել։ Բայց փաստն այն է, որ սպանություններին վերաբերող գործն անգամ դատարան չի ուղարկվել։ Եվ այս դատավարությունում սպասել, որ սպանություններ են քննարկվելու, բացահայտվելու, դա կարող են մտածել մարդիկ, ովքեր ամերիկյան ֆիլմերի տպավորության տակ են։

- Իսկ Քոչարյանի պաշտպանական թիմի համար ավելի հե՞շտ կլինի, եթե մյուս կողմը՝ տուժածները չլինեն, իսկ գուցե ավելի անհետաքրքի՞ր լինի։

- Իմ՝ որպես փաստաբանի համար ավելի հեշտ կլիներ, եթե առաջնորդվեինք օրենքով, իսկ օրենքն ասում է, որ էս դատավարությունում չպետք է լինեն տուժող, տուժողի իրավահաջորդ։ Իրենք էստեղ չպետք է լինեն այդ կարգավիճակում։ Առանձին գործ է քննվում, ու եթե ոչ իրենց չափ, իրենցից մի քիչ էլ ավելի՝ ես եմ ուզում, որ այդ բոլոր սպանությունները բացահայտվեն։ Բայց էս գործը, նորից եմ ասում, սպանությունների վերաբերյալ չէ։

hraparak.am