Թեհրանը համաձայն է փոխհատուցում վճարել ուկրաինական ուղեւորատար ինքնաթիռի կործանման կապակցությամբ

Թեհրանը համաձայն է փոխհատուցում վճարել 2020 թվականի հունվարին ուկրաինական ուղեւորատար ինքնաթիռի կործանման կապակցությամբ: Այս մասին հայտարարել է Իրանի արտաքին գործերի նախարարության պաշտոնական ներկայացուցիչ Աբաս Մուսավիին, փոխանցում է «ՌԻԱ Նովոստի»-ն։

Սակայն նա նախազգուշացրել է, որ այս հարցի իրագործումը «ժամանակ կպահանջի եւ տարբեր ասպեկտներ ունի՝ տեխնիկական եւ իրավական տեսանկյունից»: Մուսավին նաեւ հավելել է, որ զոհված ուկրաինացիների համար վճարների վերաբերյալ բանակցությունները կշարունակվեն:

Հուլիսի 12-ին Իրանի քաղաքացիական ավիացիայի կազմակերպությունը թարմացված զեկույց էր հրապարակել ուկրաինական Boeing-ի կործանման հետաքննության վերաբերյալ: Դրանում նշվում էր, ՀՕՊ համալիրը ինքնաթիռը խոցել է սխալմամբ. դեպքից կարճ ժամանակ առաջ այն տեղափոխել էին, իսկ տվյալների վերակարգավորում չէին իրականացրել մարդկային սխալի պատճառով: Դա էլ, իբր, հանգեցրել էր սխալների տվյալներում ինքնաթիռը հայտնաբերելիս:

Ուկրաինայի միջազգային ավիաընկերության Boeing 737-800 ինքնաթիռը կործանվել էր հունվարի 8-ի առավոտյան Թեհրանի օդանավակայանից դուրս գալուց հետո: Զոհվել էր 176 մարդ, այդ թվում՝ Իրանի, Ուկրաինայի, Կանադայի, Մեծ Բրիտանիայի, Գերմանիայի, Շվեդիայի եւ Աֆղանստանի քաղաքացիներ, ինչպես նաեւ անձնակազմի ինը անդամ: Իրանը խոստովանել էր, որ սխալմամբ է խոցել ինքնաթիռը: