Կորոնավիրուսի դեմ պատերազմը մենք պիտի հաղթենք մեր հասարակության և բժիշկների հետ միասին, և այդ պայքարում մեր բանակն այսօր մեր ժողովուրդն է. Արա Բաբլոյան (տեսանյութ)

Իրականում այսօր մենք և ամբողջ աշխարհը ոչ թե արտակարգ դրության, այլ պատերազմի մեջ ենք, կորոնավիրուսը մարդկությանը պատերազմ է հայտարարել, իսկ այն չի կարող գոյատևել առանց մարդկանց, պետք է գտնի մարդկային օրգանիզմներն ու հաստատվի նրանցում: «Արմնյուզ» ՀԸ «#ՕրաԽնդիր» հաղորդմանը նման կարծիք է հայտնել բժշկագիտության դոկտոր, պրոֆեսոր, ՀՀ ԱԺ նախկին նախագահ Արա Բաբլոյանը:

«Յուրաքանչյուրի պաշտպանության միջոցներն իր ձեռքում են: Պետք է հասկանանք՝ մենք հետևո՞ւմ ենք վարակի չտարածման խորհուրդներին: Վարակակիրներին չենք տանում թշնամու կողմը, նրանք մեր վիրավոր զինվորներն են, որոնց ժամանակավորապես մեկուսացնում ենք: Եթե մի պահ պատկերացնենք, թե Հայաստանը մեկուսացած է աշխարհից, կարող ենք հայտնաբերել բոլոր վարակակիրներին ու բուժել նրանց, բայց որքան էլ փակենք սահմանները, մեր հայրենակիցները շարունակելու են գալ»,- ասել է պրոֆեսորը:

Ըստ Բաբլոյանի՝ եթե այս պահին կորոնավիրուսը ժամանակավորապես հաղթահարենք, այն կշարունակի պահպանվել, և ճգնաժամի վերջնական լուծումը կարող է տարիներ տևել. «Մենք դատողություններ ենք անում համաշխարհային փորձի հիման վրա: Կան առանձնացված և կահավորված հիվանդանոցներ, որոնք պետք է ընդունեն կորոնավիրուսով վարակվածներին: Հարկ չկա, որ թեթև հիվանդացությամբ մարդիկ գնան հիվանդանոց, նրանք պետք է տանը բուժվեն: Միջին ծանրության և ծանր հիվանդների համար ստեղծված են առանձնահատուկ պայմաններ, թեև չկան սպեցիֆիկ բուժամիջոցներ»:

Բժշկի հավաստմամբ՝բոլոր պլանային վիրահատություններն ու միջամտություններն այժմ դադարեցված են, բժիշկներն զբաղված են անհետաձգելի բուժօգնությամբ. «Մենք ունենք հիվանդանոցներ, որոնք թերբեռնված են և այս պահին անելիք չունեն: Ներքին ռեզերվներն օգտագործելով՝ պետք է սպասարկել կորոնավիրուսով հիվանդներին: Ի տարբերություն պոլիկլինիկաների, որոնք պացիենտների թվով են ֆինանսավորվում, հիվանդանոցներն ավելի դժվար փուլում են, քանի որ դադարեցրել են պլանային վիրահատությունները»:

Արա Բաբլոյանի պնդմամբ՝աշխարհը երազում է պատվաստանյութ հայտնաբերել, բայց դրա համար ժամանակ է պետք. «Կարևորը՝ հարուցիչն արդեն ճանաչելի է բժշկության համար: Մենք չենք կարող թեկուզ նվազագույն բարդությունների ռիսկով պատվաստում անել, այն պետք է անվտանգ լինի մեր օրգանիզմի համար: Ամեն դեպքում, մեր հիվանդացության ցուցանիշի հարցը վերաբերում է ոչ միայն առողջապահության պատասխանատուներին, այլև մեզ, մեր կենցաղին ու վարվելակերպին»:

Նախկին նախարարի կարծիքով՝բուժաշխատողներն այսօր խոցելի են, և խոսքը ոչ միայն «Նորք» ինֆեկցիոն հիվանդանոցի, այլև Հայաստանի ամբողջ բժշկական համակազմի մասին է:«Այսօր բոլոր բժիշկներն իրենց վտանգի են ենթարկում, քանի որ հազարավոր պացիենտների հետ են առնչվում, և չգիտեն՝ այդ մարդիկ կոնտակտավո՞ր են, թե ոչ: Վազգեն Սարգսյանն արցախյան պատերազմից հետո ասաց՝ պատերազմը հաղթեցին բանակը և բժիշկները: Այս պատերազմը մենք պիտի հաղթենք մեր հասարակության և բժիշկների հետ միասին, մեր բանակն այսօր մեր ժողովուրդն է»,- ամփոփել է պրոֆեսորը:

Աղբյուր՝ tert.am