Հարավային Ամերիկայում գտնվել են ավտոմեքենայի չափ կրիայի մնացորդներ

Կոլումբիայի մայրաքաղաք Բոգոտայում Ռոսարիայի համալսարանի գիտնականները հայտնաբերել են հսկայական կրիայի մնացորդներ, որը 7-13 միլիոն տարի առաջ ապրել է Հարավային Ամերիկայում։ Հսկայական գտածո սողունն իր չափերով ավտոմեքենա է հիշեցնում, գրում է Planet- today-ը՝ հղում անելով BBC-ին։

Հսկայական Stupendemys geographicus կրիաներին հայտնաբերել էին դեռեւս անցյալ դարի 70-ականներին, բայց մինչ այժմ հնագետները այդ հին էակների մասին իրեղեն տեղեկատվություն չունեին։ Սակայն այժմ, երբ հետազոտողները հայտնաբերել են S. Geographicus-ի մնացորդները Կոլումբիայի Տատակոա անապատում, իրավիճակը փոխվել է։

Stupendemys geographicus տեսակի մեծահասակ կրիայի երկարությունը կարող էր հասնել չորս մետրի, իսկ քաշը կազմել է առնվազն 1200 կգ։ Այսինքն, հսկայական հարավամերիկյան կրիային լիարժեք կարելի է համեմատել ավտոմեքենայի հետ։ Զարմանալի է, սակայն ինչ-որ ժամանակ երկրագնդի վրա գոյություն են ունեցել նաեւ ավելի մեծ կրիաներ, օրինակ՝ արխելոնները, որոնք 70 մլն տարի առաջ ապրել են օվկիանոսներում, մինչեւ չորսուկես մետր երկարություն են ունեցել։