Հայտնի է Թաթարստանում ՌԴ պետդումայի պատգամավոր Այրաթ Խայրուլինի ուղղաթիռի վթարի պատճառը

ՌԴ պետդումայի պատգամավոր Այրաթ Խայրուլինի մահվան ելքով փետրվարի 7-ին Կազանում տեղի ունեցած ավիաողբերգության պատճառները բացահայտված են , հայտնում է Lenta.ru կայքը։

Փորձագետների տեղեկությունների համաձայն՝ ուղղաթիռը ընկել է օդաչուի սխալի, ինչպես նաև վատ եղանակի պատճառով։ Օդանավը ձնաբքի մեջ է հայտնվել, ինչի հետևանքով օդաչուն խուճապի է մատնվել և, ուղղաթիռը չափից շատ իջեցնելով, փորձել է վայրէջք կատարել։ Մասնագետների խոսքով՝ ողբերգությունից խուսափելու համար օդաչուն պետք է բարձրացներ ուղղաթիռը և փոխեր ուղղությունը։

Վայրէջքի ժամանակ ուղղաթիռը սկզբում բարձր արագությամբ գետնին է դիպել պոչով, որից հետո ամբողջ երկայնքով տապալվել է։ Խայրուլինը ուղղաթիռի առջևի ձախ մասում է նստած եղել և հարվածի ժամանակ մարմնի մի մասը դուրս է եկել ապակուց։

Ավելի վաղ հաղորդվում էր, որ վթարի հնարավոր պատճառներից մեկը կարող է լինել այն, որ «Բել -406» ուղղաթիռի ղեկին ոչ թե օդաչուն, այլ հենց ինքը՝ պատգամավորն է եղել։

Ուղղաթիռում գտնվող մյուս երկու անձինք ողջ են մնացել։ Թաթարստանի առողջապահության նախարարության տվյալներով՝ նրանք տեղափոխվել են հիվանդանոց, նրանց վիճակը գնահատվում է ծանր է:

Այրաթ Խայրուլինը ՌԴ պետդումայի 4-րդ, 5-րդ, 6-րդ և 7-րդ գումարումների պատգամավոր է եղել «Միացյալ Ռուսաստան» խմբակցությունից, եղել է Պետդումայի գյուղատնտեսական հարցերի հանձնաժողովի ղեկավարի տեղակալը:

Forbes պարբերականի տվյալներով Խայրուլինը Ռուսաստանի 100 ամենահարուստ պաշտոնյաների և պատգամավորների ցուցակում զբաղեցնում էր 96-րդ հորիզոնականը: 2018 թվականին նա դարձել է ամենահարուստ պատգամավորը Թաթարստանից, աշխատելով 158,88 միլիոն ռուբլի: