Իրանում հետապնդում են ուկրաինական ինքնաթիռի խոցման մասին հրապարակումներ անող լրագրողներին

Իրանում տասնյակ լրագրողներ «Ուկրաինայի միջազգային ավիաուղիներ»-ին պատկանած ինքնաթիռի խոցման ու դրան հաջորդած բողոքի ցույցերի վերաբերյալ հրապարակումներ անելուց հետո իշխանությունների կողմից խիստ ճնշումների են ենթարկվում, հայտնում է «Լրագրողներ առանց սահմանների» միջազգային իրավապաշտպան կազմակերպությունը (RSF):

Մասնավորապես, լրագրողներին սկսել են հարցաքննության կանչել, խուզարկություններ իրականացնել և ստիպել են սոցիալական կայքերի օգտահաշիվները փակել: Նշվում է, որ մի շարք մեդիամասնագետների անգամ սպառնացել են:

Տեղեկությունների համաձայն` փետրվարի 6-ից սկսած Իրանի իսլամական հեղափոխության պահապանների էլիտար կորպուսի կամ Հետախուզության նախարարության աշխատակիցները կանչել և հարցաքննության են ենթարկել առնվազն 21 լրագրողի:

Իրանական հետախուզության աշխատակիցներն ՈՒՄԱ-ի ինքնաթիռի խոցումից հետո ներխուժել են առանձին լրագրողների տներ և հետախուզության ընթացքում համակարգիչեր, բջջային հեռախոսներ, գրքեր, փաստաթղթեր և ձեռագրեր առգրավել: Նշվում է, որ այս պահին որևէ լրագրող ձերբակալված չէ, սակայն որոշների գործատուները զգուշացրել են, որ սոցիալական ցանցերում զգույշ լինեն իրենց արտահայտություններում: Որոշ լրագրողներ անգամ ստիպված են եղել Instagram, Twitter և Facebook սոցիալական կայքերում փակել իրենց օգտահաշիվները կամ այս թեմաների շուրջ դադարել են ազատ արտահայտվել:

Նշվում է, որ լրագրողները սկսել են ճնշումներ զգալ պետական, իրենց կարծիքով, կեղծ հայտարարությունների հրապարակումից հրաժարվելուց հետո:

Երբ Թեհրանը պաշտոնապես խոստովանեց, որ նա է խոցել ուկրաինական ուղևորատար ինքնաթիռը, երկրում բողոքի ցույցեր սկսվեցին, որը հնարավոր եղավ ուժով ցրել: Դրանից հետո որոշ լրատվականների նկատմամբ ուժեղացան ճնշումները, կառավարությունն արգելեց հրապարակել այն ամենը, ինչը «չի համապատասխանում կառավարության գծին»:

Այժմ իրանցի 80 լրագրող համատեղ հայտարարություն է պատրաստել, որտեղ ափսոսանք է հայտնում ՈՒՄԱ-ի ինքնաթիռի մասին «պետական սուտ» տեղեկություններ տարածելու համար: