Չինաստանը ցուցադրել է` ինչպես է Ուհանի 20 բնակիչ նոր կորոնավիրուսից լիովին ապաքինվելուց հետո ուրախությամբ լքում հիվանդանոցը (լուսանկարներ, տեսանյութ)

Չինաստանում ցուցադրել են նոր կորոնավիրուսի դեմ պայքարի ուղղությամբ գործադրած ջանքերը` հրապարակելով հիվանդությունից լիովին ապաքինված 20 մարդու` հիվանդանոցից դուրս գրվելու կադրերը, հայտնում է Daily Mail պարբերականը:

Պետական լրատվամիջոցներով հրապարակված և մեծ տարածում գտած 11 վայրկյան տևողությամբ տեսանյութի կադրերում երևում է, թե ինչպես են մարդիկ ուրախությամբ լքում Ուհանի Ցզինինթան հիվանդանոցը` հետևում թողնելով հիվանդությունն ու ավելի քան քսան օրվա ապրումները: Հիվանդները դուրս են գրվել մեծաքանակ բժշկական հետազոտություններ անցնելուց հետո:

Ցզինինթան հիվանդանոցը համարվում է Ուհան քաղաքում կորոնավիրուսով վարակվածներ փնտրող հիմնական հաստատություններից մեկը:

Չինաստանի իշխանություններն անհայտ տեսակի վիրուսի համաճարակի մասին Առողջապահության համաշխարհային կազմակերպությանը տեղյակ էին պահել դեկտեմբերի 31-ին: Համաճարակը բռնկվել է 11 մլն բնակչություն ունեցող Ուհան քաղաքում:

Վերջին օրերին ամբողջ աշխարհում մարդիկ խուճապի են մատնվել սրընթաց տարածվող մահացու կորոնավիրուսի պատճառով: Հիվանդների ու զոհերի թիվն օրեցօր ավելանում է, իսկ վարակման դեպքեր են արձանագրվել նաև Չինաստանից դուրս մի շարք երկրներում, ինչը հանգեցրել է համաշխարհային խուճապի:

Վերջին տեղեկությունների համաձայն` կորոնավիրուսի հետևանքով զոհերի թիվը հասել է 259-ի, վարակվածների թիվը մոտ 11 100 է: