Իրանցի զինվորականները երկրի նախագահից 3 օր թաքցրել են ուկրաինական ինքնաթիռի` իրենց կողմից խոցված լինելու փաստը

Իրանի զինվորականները, որոնց ղեկավարում է այաթոլլահ Ալի Խամենեին, երեք օր երկրի նախագահ Հասան Ռոհանիից թաքցրել են այն փաստը, որ ուկրաինական ուղևորատար ինքնաթիռը խոցվել է իրենց կողմից: Այս մասին տեղեկացնում է New York Times պարբերականը:

Պարբերականը վերականգնել է ինքնաթիռի կործանմանը հաջորդած առաջին օրերին տեղի ունեցած իրադարձությունների ժամանակացույցը: Առաջին բարձրաստիճան զինվորականը, որը իմացել է ուկրաինական ինքնաթիռի կործանման մասին, եղել է Իսլամական հեղափոխության պահապանների կորպուսի գեներալ Ամիր Ալի Հաջիզադեն: Նա իր իմացածի մասին տեղյակ է պահել գործընկերներին՝ այդ թվում Իրանի բանակի ներկայացուցիչներին: Նրանք միայն երեք օր անց են խոստովանել, որ իրենք են խոցել ինքնաթիռը:

Իրանական իշխանությունները այդ ամբողջ ընթացքում հերքում էին իրենց մասնակցությունը ինքնաթիռի կործանմանը, իսկ նախագահ Ռոհանին մի քանի անգամ փորձել էր զանգահարել զինվորականներին, սակայն վերջիններս զանգերին չեն պատասխանել:

Հիշեցնենք, որ Թեհրանի օդանավակայանից մեկնելուց անմիջապես հետո Կիև թռչող Boeing 737-800 օդանավը լույս հունվարի 8-ին խոցվել էր: Ըստ պաշտոնական տվյալների` վթարի հետևանքով մահացել է 176 մարդ` Իրանի, Ուկրաինայի, Կանադայի, Մեծ Բրիտանիայի, Գերմանիայի, Շվեդիայի և Աֆղանստանի քաղաքացիներ:

Իրանի նախագահը Twitter սոցիալական կայքի իր էջում հայտնել էր, որ «զինված ուժերի ներքին հետաքննության արդյունքում պարզվել է, որ, ցավոք, մարդկային սխալի պատճառով արձակված հրթիռներն են հանգեցրել ուկրաինական ինքնաթիռի սարսափելի աղետին և 176 անմեղ մարդկանց մահվանը»: