Չինաստանի բնակչությունը գերազանցել է 1,4 միլիարդի ցուցանիշը

Չինաստանի բնակչությունը, առանց հատուկ վարչական շրջանների` Հոնկոնգի, Մակաոյի և Թայվանի, 2019 թվականի վերջի դրությամբ ավելացել է 4,67 միլիոնով` գերազանցելով 1,4 միլիարդի ցուցանիշը: Այդ մասին են վկայում ՉԺՀ պետական վիճակագրական բյուրոյի տվյալները, հայտնում է «ՌԻԱ Նովոստի» գործակալությունը:

2018 թվականին Չինաստանի բնակչությունն ավելացել է 5,3 միլիոնով:

2019 թվականին երկրում գրանցվել է 14,65 միլիոն նորածին, իսկ ծնելիության գործակիցը կազմել է 10,48` հազար մարդու հաշվով:

Նույն տարում Չինաստանում մահացել է 9,98 միլիոն մարդ, իսկ մահացության գործակիցը կազմել է 7,14` հազար մարդու հաշվով:

Բնակչության բնական աճը կազմել է 3,34` հազար մարդու հաշվով: Արական սեռի բնակչության թիվը կազմել է 715,27 միլիոն, իգականը` 684,78 միլիոն: Բնակչության ընդհանուր թվաքանակը հասել է 1 միլիարդ 400 միլիոն 50 հազար մարդու:

Մեկ տարվա ընթացքում քաղաքային բնակչությունն աճել է 17,06 միլիոնով և կազմել 848,43 միլիոն մարդ, մինչդեռ գյուղական բնակչությունը նվազել է 12,39-ով և կազմել 551,62 միլիոն մարդ: Քաղաքային բնակչության մասնաբաժինը 59,58%-ից աճել է մինչև 60,6%: