Բնապահպան ակտիվիստուհի Գրետա Տունբերգի հայրը խոստովանել է, որ բուսակեր է դարձել իր դստերը փրկելու համար

Շվեդ բնապահպան ակտիվիստուհի Գրետա Տունբերգի հայրը՝ Սվանտե Տունբերգը, խոստովանել է, որ բուսակեր է դարձել իր աղջկան փրկելու համար: ТАСС գործակալության փոխանցմամբ՝ այս մասին վերջինս հայտնել է BBC ռադիոկայանին տված հարցազրույցում՝ հատուկ նախատոնական ծրագրի շրջանակներում:

«Ես դա չեմ արել կլիմայի փրկության համար, ես դա արել եմ, որպեսզի փրկեմ իմ երեխային»,- ասել է դերասան, պրոդյուսեր, սցենարիստ և ռեժիսոր Տունբերգը՝ նշելով, որ դա 3-4 տարվա պատմություն է, երբ իր աղջիկը դադարել էր ուտել և այլ մադկանց հետ խոսել:

Նա հավելել է, որ իր կինը՝ օպերային երգչուի Մալենա Էրնմանը, նույն պատճառով ամբողջությամբ փոխել է իր կարիերան և հրաժարվել ավիաչվերթներից, որոնք վնաս են հասցնում շրջակա միջավայրին: Հոր խոսքով՝ այդ քայլերը «մեծ էներգիա» են տվել Գրետային՝ օգնելով նրան հաղթահարել կյանքի բարդ շրջանը:

Անդրադառնալով այն հարցին, որ աղջկա մոտ ախտորոշվել էր Ասպերգերի համախտանիշ, նա նշել է, որ իրենք սկսել են շատ ժամանակ միասին անցկացնել, որպեսզի խնդրին արագ լուծում տան:

Խոսելով Գրետայի գործունեության մասին՝ Սվանտե Տունբերգը խոստովանել է, որ սկզբում այնքան էլ ուրախ չեն եղել իրենց դստեր վճռականության համար:

Հիշեցնենք, որ Գրետա Տունբերգն առավել մեծ հայտնիություն է ձեռք բերել ՄԱԿ-ում սեպտեմբերին ունեցած ելույթից հետո, երբ 16-ամյա ակտիվիստուհին կլիմայական փոփոխությունների թեմայով գագաթնաժողովին ներկա համաշխարհային առաջնորդներին մեղադրել է նրանում, որ իրենց խոստումներով ու քայլերով խլել են իր մանկության երազանքները: