Ռոբերտ Քոչարյանին փորձում են ոչնչացնել որպես դիմադրողականության կենտրոն

Միշտ կողմ եմ եղել, որ աշխատավարձերը բարձր լինեն, այն մարդը, ով պետական ապարատում է աշխատում, պետք է արժանապատիվ ապրի: Այս մասին այսօր մամուլի ասուլիսին ասաց PR տեխնոլոգ Կարեն Քոչարյանը՝ անդրադառնալով նախարարների աշխատավարձերի բարձրացմանը: «Ինչո՞ւ թաքուն, ես դա չեմ կարողանում հասկանալ: Ինձ դուր է գալիս ՊԵԿ նախագահի մոտեցումը, ով ասում է, որ աշխատում ենք և պետք է ստանանք»,-ասաց նա:

Ինչ վերաբերում է սկզբնական շրջանում պաշտոնյաների՝ հեծանիվով, ոտքով աշխատանքի գնալուն, այլ PR ակցիաներին, Կարեն Քոչարյանը նշեց. «Այդ միանգամյա PR քայլերն էյֆորիկ իրավիճակում են աշխատում, իսկ երբ էյֆորիկ ալիքը գրեթե լիովին նստել է, այդպիսի բաներն էլ չեն աշխատում, դրա համար էլ չի էլ արվում»,-ասաց նա:

Ռազմական պահեստազորի պետ Վոլոդյա Հովհաննիսյանը նշեց, որ թեև հայտարարվել է, որ սպաների աշխատավարձերը բարձրացել են, բայց իրականում աշխատավարձերն ընդհանրապես չեն բարձրացել, այլ միայն հավելավճարներն են բարձրացել, այն էլ՝ երեք տոկոսով: Ըստ նրա, երբ այլ կարևոր ոլորտների աշխատավարձերը չեն բարձրացել, այս բարձրացումն անբարոյականության բացարձակ արտահայտություն է:

«Սա պարզապես յուրայինների լավ ապրելու տենդենց է: Նիկոլ Փաշինյանը մսխում և փոշիացնում է ՀՀ պետական բյուջեն, այն ծառայում է ոչ թե ժողովրդին, այլ մերձակա շրջապատի հարստացմանը»,-ասաց նա:

Ռազմագետ Գևորգ Գրիգորյանը կարևորեց աշխատավարձերի համաչափ բարձրացումը: «Հարցն այն է, թե ինչո՞ւ այդ ամենը արվեց գաղտնի»,-ասաց նա: Անդրադառնալով արտաքին վտանգներին՝ նա նշեց, որ մեր ժողովուրդն այսօր ավելի շատ կենտրոնացած է շոուների, քան մարտահրավերների վրա, որոնք կապված են մեր անվտանգության հետ:

«Մենք չենք կարողանում դինամիկ բարձրացնել մեր փոխհարաբերությունները Ռուսաստանի հետ: Թուրքիան ակտիվ ջերմ հարաբերություններ է ստեղծում Ռուսաստանի հետ, իսկ մենք, լինելով ՀԱՊԿ անդամ երկիր, չենք կարողանում լինել ռազմական գործընկեր: Ներկա իշխանությունն ավելի է հեռացնում երկիրը ռազմական գործընկերոջ հետ կառուցողական կապերից»,-ասաց նա:

Անդրադառնալով Արսեն Բաբայանի դեմ իրականացվող գործողություններին՝ Գևորգ Գրիգորյանը նշեց, որ կգա ժամանակ և այդ նույն դատին կարժանանան դատողները: Նույն հարցի վերաբերյալ Կարեն Քոչարյանը նկատեց, որ Արսեն Բաբայանին մեղադրում են իշխանությունը յուրացնելուն օժանդակելու մեջ և նշեց. «Ստացվեց, որ յուրացնողը չկա, բայց կա օժանդակողը, իսկ իրավաբաններն ասում են, որ դա նոնսենս է»:

Ինչ վերաբերում է Նաիրի Հունանյանի ազատ արձակելու հավանականությանը, նա նշեց. «Ինչ էլ լինի, չեմ հավատում, որ որևէ իշխանություն կանի նման բան: Չեմ հավատում, որ կա որևէ անհատ, որը կփորձի հող հանձնել, նույնը կարող եմ ասել Նաիրի Հունանյանին ազատ արձակելու մասին»,-ասաց նա:

Վոլոդյա Հովհաննիսյանը նկատեց, որ այն հոդվածով, որով Արման Բաբաջանյանի հայտարարության հիման վրա է քրեական գործ է հարուցվել, կալանք չի լինում, տույժ է լինում: «Երբ տեսել են, որ չեն կարող Արսեն Բաբայանին կալանքի մեջ պահել, նոր հոդվածով են մեղադրանք առաջադրել»,-ասաց նա:

Նա նշեց նաև, որ չկա այն տուժող սուբյեկտը, որը իրավական հարթության վրա պատասխան պետք է պահանջեր: «Արսեն Բաբայանին մեղադրում են այնպիսի արարքների համար, որոնք իրավաբանության մեջ ընդհանրապես գոյություն չունեն»,-ասաց նա: Ըստ նրա՝ այստեղ Հրայր Թովմասյանին իրավական համակարգից հեռացնելու հարցն է դրված, և ընտրվել է քաղաքական ազդեցության ստոր մեթոդներ:

«Ռոբերտ Քոչարյանին փորձում են ոչնչացնել որպես դիմադրողականության կենտրոն, իսկ Սահմանադրական դատարանի ոչնչացումն արվում է ոչ միայն Ռոբերտ Քոչարյանի համար, այլ նաև այն բանի, որ Ղարաբաղյան հարցի վերջնական որոշումը պետք է կատարի Սահմանադրական դատարանը»,-ասաց նա: