Կրիշտիանու Ռոնալդուն ներկայացրել է իր նոր օծանելիքի զվարճալի գովազդային հոլովակը (տեսանյութ, լուսանկերներ)

Հանրահայտ ֆուտբոլիստ Կրիշտիանու Ռոնալդուն երկրպագուներին ներկայացրել է իր նոր՝ CR7 Play It Cool օծանելիքի զվարճալի գովազդային հոլովակը, և ապացուցել, որ չի վախենում համարձակ կերպարներով՝ նույնիսկ ընձառյուծի խալաթով և մեծ ու փափուկ հողաթափերով հանդես գալուց, գրում է Daily Mail-ը:

Նոր գովազդային հոլովակում 34-ամյա ֆուտբոլիստն անհաջող օր է ունենում և հայտնվում է մի շարք ձախորդությունների մեջ՝ նույնիսկ ընկնում է լողավազանը, սակայն օծանելիքի մի քանի կաթիլն ամբողջովին վերափոխում են նրա օրը՝ դարձնելով նրան ավելի ինքնավստահ և հաջողակ:

Ֆուտբոլային աշխարհի աստղը, ինչպես գրում է աղբյուրը, անցյալում նույնպես հանդես է եկել մի շարք գովազդային արշավներում, որոնք արժանացել են երկրպագուների բուռն արձագանքին:

Խոսելով նոր օծանելիքի մասին՝ ֆուտբոլիստը հայտնել է. «Ես իսկապես կարծում եմ, որ օծանելիքը կարող է ամբողջովին կերպարանափոխել քեզ: Լավ օծանելիքը քեզ ինքնավստահություն է ներշնչում և երևան է հանում քո ամենակարող եսին, և ես ցանկանում էի այդ զգացողությունն ամփոփել CR7 Play It Cool-ի սրվակի մեջ»:

Ֆուտբոլիստի խոսքով՝ օծանելիքի ստեղծած զգացողությունն իրենց անհաղթելի է դարձնում: Ռոնալդուն հույս է հայտնել, որ մարդիկ նույնպես այդպիսի զգացողություններ կունենան:

Ֆուտբոլիստի խոսքով՝ բոլորս էլ ունենում ենք «անհաջող առավոտներ»:

«Ցանկանում էի, որ մարդիկ ինձ տեսնեն մի կերպարով, որով առաջ չէին տեսել»,- հայտնել է Ռոնալդուն և հավելել, որ այդ պատճառով էլ որոշել է հանդես գալ զվարճալի կերպարում: