Եվրոպայի լիգա․ «Արարատ-Արմենիան» դուրս եկավ երրորդ փուլ

Ֆուտբոլի Հայաստանի չեմպիոն Երեւանի «Արարատ-Արմենիան» դուրս եկավ Եվրոպայի լիգայի որակավորման երրորդ փուլ՝ հաղթահարելով Ջիբրալթարի «Լինքոլնի» արգելքը։

Ջիբրալթարում տեղի ունեցած պատասխան խաղում Վարդան Մինասյանի գլխավորած թիմն առավելության հասավ 2։1 հաշվով։

Առաջին խաղակեսի ավելացված առաջին րոպեին աչքի ընկավ նիգերիացի հարձակվող Լուիս Օգանան, որն օգտագործեց Բուրկինա Ֆասոն ներկայացնող հարձակվող Զաքարիա Սանոգոյի փոխանցումը։ Երկրորդ խաղակեսում Լուիս Օգանան եւս մեկ անգամ գրավեց մրցակցի դարպասը։ Արդյունավետ փոխանցումը կատարեց Հոլանդիան ներկայացնող հարձակվող Նարսինգը։

Նշենք, որ «Արարատ-Արմենիայի» մեկնարկային կազմում կար Հայաստանի միայն մեկ ներկայացուցիչ՝ հարձակվող Պետրոս Ավետիսյանը։ Երկրորդ խաղակեսում փոխարինման դուրս եկան պաշտպան Արթուր Դանիելյանը եւ կիսապաշտպան Գոռ Մալաքյանը։

Հիշեցնենք, որ Երեւանում «Արարատ-Արմենիան» առավելության էր հասել 2։0 հաշվով։

«Արարատ-Արմենիան» երրորդ փուլում կմրցի Չեմպիոնների լիգայի որակավորման երկրորդ փուլի «Սաբուրտալո» (Վրաստան) - «Դինամո Զագրեբ» (Խորվաթիա) զույգում պարտվողի հետ: Այս թիմերի առաջին խաղում 2։0 հաշվով հաղթել է «Դինամո Զագրեբը»։

Երրորդ փուլի հանդիպումները տեղի կունենան օգոստոսի 8-ին եւ 15-ին։

Եվրոպայի լիգա, որակավորման փուլի պատասխան խաղ

«Լինքոլն» - «Արարատ-Արմենիա»՝ 1։2 (առաջին խաղ՝ 0։2)

Անտոնի Էրնանդես, 74 - Լուիս Օգանա, 45+1, 58