Ստամբուլի կոնվենցիան ներկայումս գտնվում է վավերացման փուլում․ ԱԳՆ

Կանանց եւ ընտանեկան բռնության կանխարգելման եւ դրա դեմ պայքարի եվրոպական կոնվենցիան (Ստամբուլի կոնվենցիա) ներկայումս Արտաքին գործերի նախարարության նախաձեռնությամբ գտնվում է վավերացման ընթացակարգերի փուլում։ Այս մասին Հայաստան-Եվրոպայի խորհուրդ 2019-2022թթ. Գործողությունների ծրագրում Կանանց եւ ընտանեկան բռնության կանխարգելման ծրագրի պաշտոնական մեկնարկի կապակցությամբ իր ելույթում հայտարարել է ՀՀ ԱԳ նախարարի տեղակալ Ավետ Ադոնցը։

«Երկու շաբաթ առաջ Երեւանում արտաքին գործերի նախարար Զոհրաբ Մնացականյանի եւ Եվրոպայի խորհրդի գլխավոր քարտուղարի տեղակալ Գաբրիելա Բատաինի-Դրագոնիի կողմից տրվեց 2019-2022թթ. Հայաստան-Եվրոպայի խորհուրդ Գործողությունների ծրագրի պաշտոնական մեկնարկը, որը հմտությունների ամրապնդման եւ մեր օրենսդրական դաշտը եվրոպական չափանիշներին համապատասխանեցնելու կարեւոր գործիք է։

Ընթացիկ տարվա ապրիլին Գործողությունների ծրագրում մեկնարկեց դատաիրավական բարեփոխումների բաղադրիչը, որը մեր կառավարության օրակարգի առաջնահերթ ուղղություններից է եւ օժանդակելու է Հայաստանի դատական համակարգի բարենորոգմանը։ Այսօր էլ ազդարարում ենք Կանանց եւ ընտանեկան բռնության կանխարգելման ծրագրի սկիզբը։

Հայաստանը՝ որպես համամարդկային արժեքների, այդ թվում՝ Եվրոպայի խորհրդի սկզբունքների կրող, հավատարիմ է դրանց խթանմանը թե´ ազգային եւ թե´ միջազգային մակարդակներում։ Մենք մեծապես կարեւորում ենք կանանց իրավունքների առաջխաղացումը հասարակական կյանքում, առաջնահերթ՝ ժողովրդավարական գործընթացներում։ Թավշյա հեղափոխության հաջողությունը, որին ամենակտիվ մասնակցությունն ունեցան նաեւ հայ կանայք եւ աղջիկները, դրա վառ ապացույցն է։

Այս փորձը վերահաստատում է պետության եւ հասարակության սոցիալ-քաղաքական կյանքում կանանց առանցքային դերը, հետեւաբար նաեւ կանանց բարոյական եւ ֆիզիկական անվտանգ միջավայրի, հավասար իրավունքների ու հնարավորությունների ապահովման կարեւորությունը։ Սա Հայաստանի կառավարության ծրագրի առաջնահերթություն է։

Հայաստանը 2018թ. հունվարին ստորագրել է Կանանց եւ ընտանեկան բռնության կանխարգելման եւ դրա դեմ պայքարի եվրոպական կոնվենցիան (Կանանց եւ ընտանեկան բռնության կանխարգելման եւ դրա դեմ պայքարի եվրոպական կոնվենցիան կոչվում է նաեւ Ստամբուլի կոնվենցիա, քանի որ ստորագրման է բացվել 2011թ. Ստամբուլում)։ Այդ համատեքստում արտաքին գործերի նախարարության նախաձեռնությամբ կոնվենցիան ներկայումս գտնվում է վավերացման ընթացակարգերի փուլում։ Անցյալ տարվանից գործում է նաեւ կանանց եւ ընտանեկան բռնության կանխարգելման Հայաստանի Հանրապետության օրենքը։

Լիահույս եմ, որ այսօր մեկնարկող Կանանց եւ ընտանեկան բռնության կանխարգելման ծրագիրն ուղի կբացի Եվրոպայի խորհրդի կոնվենցիայի մոտալուտ վավերացման, ինչպես նաեւ կոնվենցիայի դրույթներն ու պրակտիկ գործիքներն ազգային օրենսդրությունում եւ գործնական դաշտում ներդնելու համար։

Հարկ է նշել նաեւ, որ կանանց համար արդարադատության հասանելիության վերաբերյալ մեկ այլ ծրագիր իրականացվում է Եվրամիության կողմից ֆինանսավորվող «Գործընկերություն հանուն լավ կառավարման» օժանդակ ծրագրի շրջանակում։

Արտաքին գործերի նախարարությունը բարձր է գնահատում Գործողությունների ծրագրին մեր գործընկերների աջակցությունը։ Տվյալ դեպքում՝ Կանանց եւ ընտանեկան բռնության կանխարգելման ծրագրի ֆինանսավորմանը մասնակցել են Գերմանիան, Նորվեգիան, Իռլանդիան, Լիխտենշտայնը։

Մենք վճռական ենք բարելավել նախորդ փուլի Գործողությունների ծրագրի ֆինանսավորման եւ արդյունավետ իրականացման հաջողությունը։ Բավական կլինի նշել միայն, որ նոր մեկնարկած Գործողությունների ծրագրում ապահովված է արդեն սահմանված բյուջեի (19 մլն. եվրո) ավելի քան 50%-ի ֆինանսավորումը։

Ավարտելով՝ արդյունավետ համագործակցություն եմ մաղթում Կանանց եւ ընտանեկան բռնության կանխարգելման ծրագրի շահառու գերատեսչություններին եւ կառույցներին»,-նշել է նա։

Բաժանորդագրվեք Top-News.am-ին Telegram-ում