Երկար տարիներ Սեւանի նկատմամբ հանցագործություն է կատարվել. ՀԿ ներկայացուցիչ

Երկար տարիներ Սեւանի նկատմամբ հանցագործություն է կատարվել: Հուլիսի 4-ին Սեւանի խնդիրների շուրջ քննարկման շրջանակում այս մասին ասաց Համահայկական բնապահպանական ճակատի ներկայացուցիչ Լեւոն Գալստյանը:

Նրա խոսքով՝ սա վկայում է նաեւ այն մասին, որ կան նաեւ հանցագործներ, որոնք պետք է պատժվեն, այլապես անպատժելիությունը կրկնակի հանցագործություններ կծնի:

«Բոլոր մասնագետները, որոնք դրական եզրակացություն են տվել Սեւանի էկոհամակարգի վերաբերյալ, եւ բոլոր պաշտոնատար անձինք, որոնք որոշումներ են ընդունել, պետք է պատասխան տան իրենց գործողությունների համար: Հույս կա, որ հեղափոխությունից հետո այս գործընթացները կսկսվեն, եւ մենք կիմանանք, թե ովքեր են մեղավորները: Անհասկանալի է, թե ինչո՞ւ է, օրինակ, որոշում ընդունվել այն մասին, որ լճից պետք է բաց թողնել 170 մլն խորանարդ մետր ջուր, այլ ոչ 120»,- նշեց նա:

Նա վստահ է, որ երկար տարիներ անցկացվել է Սեւանում ջրի մակարդակի բարձրացման արհեստական խոչընդոտման քաղաքականություն:

Գալստյանը շեշտեց, որ ընթացիկ տարվա մայիսին նամակներ են ուղարկվել համապատասխան կառույցներ, սակայն դրանց պատասխանները նույնքան ստանդարտ են, որքան եղել են վերջին 7-8 տարիներին:

«Համընդհանուր մոբիլիզացիա է անհրաժեշտ, ցանկալի է վարչապետի կոչով այն մասին, որ անցկացվեն լայնածավալ մաքրման աշխատանքներ, որից հետո պետք է սկսել ջրի մակարդակի բարձրացման աշխատանքները: Դրանից բացի, չկա Սեւանի վիճակի մասին տվյալների միասնական բազա: Չկա նաեւ հանրային վերահսկողություն, որը կարող է դառնալ լուրջ զսպող գործոն կրկնակի հանցագործությունների իրականացման համար»,- եզրափակեց նա:

Բաժանորդագրվեք Top-News.am-ին Telegram-ում