Բարի Ալիբասովը խափանել է «На самом деле» հաղորդման նկարահանումները, որտեղ պետք է խոսվեր իր թունավորման մասին

Հայտնի երաժշտական պրոդյուսեր Բարի Ալիբասովը խափանել է ռուսական Առաջին ալիքով հեռարձակվող «Իրականում» («На самом деле») հաղորդման նկարահանումները՝ հաղորդմանը չներկայանալով, հաղորդում է ria.ru-ն:

Աղբյուրի տեղեկություններով՝ թոք-շոուի շրջանակում պրոդյուսերը պետք է ստի դետեկտորի միջոցով պատասխաներ իր թունավորման մասին հարցերին։ Նկարահանումներից առաջ ստուդիայում հավաքվել էին փորձագետներ ու Ալիբասովի մտերիմները, այդ թվում՝ պրոդյուսերի որդին։

«Ինչ-որ պահի պարզ դարձավ, որ ֆորսմաժորային իրավիճակ է ստեղծվել»,- հայտնել է հաղորդման հանդիսականներից մեկը: Նրա խոսքով՝ փորձագետներին առաջարկել են հանդերձարաններում նստել:

Հաղորդման ղեկավարությունը զանգահարել է Ալիբասովին, սակայն միայն մի քանի ժամ անց նոր պարզ է դարձել, որ պրոդյուսերը վատ ինքնազգացողության պատճառով չի կարող ներկա գտնվել հաղորդման նկարահանումներին:

Ավելի վաղ հաղորդվել էր, որ Ալիբասովը ծանր վիճակով հիվանդանոց էր տեղափոխվել այն բանից հետո, երբ խողովակներ մաքրելու համար նախատեսված հեղուկ էր խմել՝ շփոթելով այն հյութի հետ։ Բժիշկները նրա մոտ կերակրափողի 4-րդ աստիճանի, ստամոքսի 2-րդ աստիճանի և շնչառական ուղիների այրվածքներ էին ախտորոշել։ Սակայն շատերը պնդում են, որ նա դա «փիառի» նպատակով է արել:

Բաժանորդագրվեք Top-News.am-ին Telegram-ում