«Ֆուլ Հաուս»-ի նոր կերպարների եւ դերասանների ընտրության մասին

Շատ շուտով՝ գարնանը, հեռուստադիտողները կկարողանան վայելել «ֆուլ Հաուս» սիրված սիթքոմի նոր՝ 6-րդ եթերաշրջանը: NEWS.am STYLE-ը հումորային նախագծի նորությունների մասին զրուցել է «Ֆուլ Հաուս»-ի պրոդյուսեր եւ դերասան Արմեն Պետրոսյանի՝ Մենչի հետ:

Պրոդյուսերը տեղեկացրեց, որ նոր եթերաշրջանում այլեւս չենք տեսնի Լիլիթին եւ Իշխանիկին: Փոխարենը սիթքոմում ավելացել են նոր կերպարներ, որոնց կմարմնավորեն Հայկ Պետրոսյանն ու Թամարա Պետրոսյանը: Հայկը հանդես կգա պատգամավորի տղայի կերպարում, իսկ Թամարայի հերոսուհին կփորձի օգնել Սերգեյին, որպեսզի Մարջան Ավետիսյանի հերոսուհի Տամարան վերջինից ապահարզան խնդրի եւ իր ունեցվածքը ստիպված լինի կիսել Սերգեյի հետ.

«Հայկն ու Թամարան ավելի շատ բացասական կերպարներ կլինեն: Դերասանական կազմի ընտրությունը պայմանավորված է նրանով, որ նախ՝ նրանք համապատասխանում են իրենց կերպարներին, բացի այդ՝ երկուսն էլ պրոֆեսիոնալ դերասաններ են, որոնք ունեն նկարահանվելու մեծ փորձ»,-նշեց Մենչը, որը, սակայն, չցանկացավ բացահայտել սյուժետային այլ մանրամասներ:

«Սիթքոմի նոր ինտրիգների մասին առայժմ չեմ կարող պատմել»,-հավելեց նա՝ տեղեկացնելով, որ «Ֆուլ Հաուս»-ի նոր եթերաշրջանը երկրպագուների համար հասանելի կլինի մարտ ամսվա կեսերից:

Սյունե Առաքելյան

NEWS.am STYLE