ԱՄՆ-ում ստեղծել են արձակուրդի լուսանկարներ կեղծելու ծառայություն

Ամերիկյան Նեբրասկա նահանգում ստեղծել են արձակուրդային հանգստի լուսանկարները կեղծելու ծառայություն: Fake A Vacation ծրագիրը փոխում է լուսանկարներն այնպես, կարծես լուսանկարի մարդիկ այցելել են Հավայան կղզիներում ավազե լողափ կամ Նիագարայի ջրվեժ, սակայն իրականում անգամ չեն լքել իրենց քաղաքը, հաղորդում է Esquire-ը:

Ծառայությունը թույլ է տալիս ընտրել գրեթե յուրաքանչյուր հանրահայտ տեղանքը, ինչպիսիք են Դիսնեյլենդը, Լաս Վեգասը, Գրանդ Կանյոնը եւ այլն: Օգտատերերը պարզապես ընտրում են ցանկալի, սակայն կեղծ ֆոնը եւ ավելացնում դրանում իրենց լուսանկարները: Այդ ծառայության նպատակն է սոցիալական ցանցերում հետեւորդների վրա տպավորություն գործելն ու նրանց ստիպելը նախանձել «զբոսաշրջիկներին»:

Լուսանկարների մշակման միջին տեւողությունը 72 ժամ է:

«Մեր ծառայությունից օգտվում են, քանի որ երբեմն իրական հանգիստը շատ թանկ արժե, երբեմն էլ պարզապես ցանկանում են ստիպել ուրիշներին նախանձել»,-պարզաբանում է Fake A Vacation ծրագրի մարքեթինգի բաժնի ղեկավար Թոմ Էդան:

Jetcost զբոսաշրջային կայքի անցկացրած վերջին հետազոտությունը ցույց է տվել, որ հարցված ամերիկացիների շուրջ 14 տոկոսը ստել է իր արձակուրդային հանգստի մասին: Իսկ ստի հիմնական պատճառը նրանք նշել են ակտիվ զբոսաշրջիկներ թվալու ցանկությունը ինչ-որ մեկի վրա տպավորություն գործելու համար:

«Ներկայումս սոցիալական ցանցերի ճնշման պայմաններում մարդիկ կարծում են, որ նրանք պետք է անընդմեջ ինչ-որ մեկին ինչ-որ բան ապացուցեն»,-ասել է Jetcost-ի ներկայացուցիչը Fox News-ին տված հարցազրույցում: