Իսրայելի ԱԳՆ–ն փորձում է Բաքվին բացատրել Լապշինի միջադեպի շուրջ աղմուկի աննպատակահարմարությունը

Իսրայելի ծառայությունները արել են հնարավոր ամենը, որպեսզի Լապշինը չհայտնվի Ադրբեջանի բանտում։ Այս մասին հայտարարել է քաղաքագետ Ալեքսանդր Ցինկերը՝ NEWS.am –ի թղթակցի խնդրանքով մեկնաբանելով Բելառուսից Ադրբեջան բլոգեր Ալեքսանդր Լապշինի հնարավոր արտահանձնման շուրջ իրավիճակի եւ նման քայլի՝ Իսրայելի եւ Ադրբեջանի միջեւ հարաբերությունների վրա ազդեցության մասին հարցը։

«Ադրբեջանի ԱԳՆ–ի «անցանկալի անձերի» սեւ ցուցակում, որոնց վրա տարածվում է երկիր մուտք գործելու արգելքը, ավելի քան 500 մարդ կա։ Ցուցակում հավաքվածները շատ լուրջ մարդիկ են՝ օպերայի եւ էստրադայի համաշխարհային աստղեր, իրենց երկրների կառավարություններում եւ խորհրդարաններում լուրջ պաշտոններ զբաղեցնող քաղաքական գործիչներ, քաղաքագետներ, լրագրողներ եւ Միացյալ Նահանգների ու Եվրոպայի ԶԼՄ–երի ներկայացուցիչներ։ Մինչեւ հիմա այդ ցուցակից եւ ոչ մեկի նկատմամբ միջազգային հետախուզում չէր հայտարարվել։

Լապշինի նկատմամբ միջազգային հետախուզում հայտարարելու պաշտոնական վարկածը Ադրբեջան մուտք գործելու արգելքը խախտելն է։ Ավելի իրատեսական պատճառը, իմ կարծիքով, բլոգերի կողմից ադրբեջանցի սահմանապահների եւ այլ պաշտոնյաների մտավոր կարողությունների ոչ շահեկան նկարագրությունն է։

Իսրայելի արտգործնախարարության ներկայացուցիչները առաջին իսկ օրից փորձում են հարցը կարգավորել առանց Լապշինի արտահանձնման։ Խնդիրն այն է, որ պաշտոնական Բաքուն նրան չի դիտարկում որպես Ադրբեջանի օրենքը խախտած Իսրայելի քաղաքացի։ Նրանց համար Լապշինը այն երկրի քաղաքացին է, որի փաստաթղթով խախտել է օրենքը, իսկ դա ռուսական կամ ուկրաինական անձնագիրն է եղել։

Չնայած դրան, Իսրայելի ԱԳՆ–ն՝ միանալով գրծընթացին փորձում է բացատրել Ադրբեջանի ղեկավարությանը միջադեպի շուրջ աղմուկ բարձրացնելու եւ, բացի Ռուսաստանի եւ Ուկրաինայի՝ նաեւ Իսրայելի քաղաքացի հանդիսացող անձի արտահանձնման աննպատակահարմարությունը։ Դիտարկվում են միջադեպի խաղաղ հանգուցալուծման տարբեր փոխզիջումային տարբերակներ։ Ամեն դեպքում, ըստ իս, իսրայելական ծառայությունները պետք է անեն հնարավոր ամենը, որպեսզի Լապշինը չհայտնվի Ադրբեջանի բանտում։

Միայն ափսոսալ կարելի է, որ Իսրայելի ԱԳՆ–ի ծառայությունների նման ակտիվություն չեն ցուցաբերում նաեւ Ռուսաստանի արտաքին գերատեսչության ներկայացուցիչները, չնայած այն հանգամանքին, որ Ռուսաստանը եւ Բելառուսը 1999 թվականից մեկ ընդհանուր պետություն են՝ այստեղից բխող բոլոր հնարավորություններով եւ պայմանավորվածություններով», – նշել է Ալեքսանդր Ցինկերը։

Միեւնույն ժամանակ, քաղաքագետի խոսքով, դեռեւս վաղաժամ է խոսել Ադրբեջան Լապշինի անրտահանձնման դեպքում Թել–Ավիվի հնարավոր քայլերի եւ ադրբեջանա–իսրայելական հարաբերությունների հավանական վատթարացման մասին.– «Ուզում եմ հավատալ, որ ամեն ինչ լավ կավարտվի»։

NEWS.am