Էրդողանն «անցել է» Դարվինին

Թուրքիայի դպրոցների ուսումնական պլաններից պետք է հանվի Դարվինի էվոլուցիոն տեսությունը. աշակերտները դաստիարակվելու են որպես «բարեպաշտ մուսուլմաններ»։ Քիչ չեն նրանք, որոնք սա դիտարկում են որպես «վերադարձ միջնադար», գրում է Tagesanzeiger–ը։

«Քայլ առ քայլ երկիրը գլորվում է դեպի անցյալը, – նշում է թղթակից Էնվեր Ռոբելին, – վերջերս նախագահ Ռեջեփ Էրդողանի իշխող կուսակցությունը փոփխություններ է կատարել Սահմանադրության 18 գլուխներում, որոնք կարող են Թուրքիան դարձնել իսլամական բնույթի ավտոկրատ երկիր։ Այս տարվա ապրիլին կայանալիք սահմանադրական հանրաքվեն վերջնականապես կորոշի Թուրքիայի ճակատագիրը»։

Իսկ առայժմ, նշում է հոդվածագիրը, Էրդողանի կողմնակիցները իրականացնում են մշակութային հեղափոխություն։ «Կրթության նախարար Իսմեթ Յըլամի կարծիքով, ապագայում միջին դասարանների աշակերտները չպետք է ծանոթանան Դարվինի տեսությանը, ըստ որի մարդն առաջացել է կապիկից. այն կհանվի դասագրքերից։ Ամենայն հավանականությամբ, Թուրքիայի դպրոցականների ուղեղներում պետք է սերմանեն այն գաղափարը, որ մարդիկ, կենդանիներն ու բույսերը ամենազոր Ալլահի արարչագործությունն են։ Յըլմազի գերատեսչության վերջերս ներկայացրած նոր ուսումնական պլանները կարող են կիրառվել փետրվարի վերջին», – գրում է Tagesanzeiger–ը։

news.am