Հայտնի են International Emmy Awards մրցանակաբաշխության հաղթողների անունները

Այսօր Նյու Յորքում հայտնի են դարձել International Emmy Awards մրցանակաբաշխության հաղթողները: Արդյունքները հրապարակվել են մրցանակաբաշխության պաշտոնական կայքում:

Լավագույն դերասան է ճանաչվել դանիական «Աստծո ճանապարհները» (Herrens Veje) հեռուստասերիալի գլխավոր դերակատար Լարս Միկկելսենը։ Լավագույն դերասանուհի է ճանաչվել Աննա Շուդթը՝ գերմանական «Մրսածությունը լրիվ բավական կլիներ» (Ein Schnupfen hätte auch gereicht) հեռուստասերիալում խաղացած դերի համար:

Մրցանակի են արժանացել Nevsu իսրայելական կատակերգությունը, BBC հեռուստաալիքի արաբական տարբերակի արտադրած «Մնաս բարով, Հալեպ» (Goodbye, Aleppo) փաստագրական ֆիլմը և իսպանական «Թղթե տուն» (La Casa de Papel) սերիալը՝ որպես լավագույնն իրենց ժանրում:

Մրցանակաբաշխության ժամանակ շնորհվել է 11 արձանիկ՝ 10 երկրների ներկայացուցիչներին և արտադրանքներին:

International Emmy Awards-ը ֆիլմարտադրության ոլորտում ամենահեղինակավոր մրցանակաբաշխություններից մեկն է, որը շնորհվում է ԱՄՆ-ից դուրս ստեղծված լավագույն հեռուստատեսային նախագծերի համար: