Իրանը, Թուրքիան եւ Ադրբեջանը Մերձավոր Արեւելքում իրադարձությունների վերաբերյալ նման դիրքորոշումներ ունեն. Զարիֆ

Իրանը, Թուրքիան եւ Ադրբեջանը Մերձավոր Արեւելքում իրադարձությունների վերաբերյալ նման դիրքորոշումներ ունեն եւ մտադիր են համատեղ համագործակցությունն ամրապնդել: Այս մասին Իրանի ԱԳ նախարար Մոհամմադ Ջավադ Զարիֆը հայտարարել է Ստամբուլում իր ադրբեջանցի եւ թուրք գործընկերներ Էլմար Մամեդյարովի եւ Մեւլութ Չավուշօղլուի հետ համատեղ մամուլի ասուլիսում, փոխանցում է PressTV-ն:

«Թեհրանի, Անկարայի եւ Բաքվի միջեւ համագործակցությունը անչափ կարեւոր է երեք երկրների, տարածաշրջանի զարգացման, կյանքի պայմանների բարելավման եւ տարածաշրջանային խաղաղությանն ու անվտանգությանը նպաստելու համար»,- ասել է նա:

Զարիֆը հույս է հայտնել, որ տարածաշրջանային խնդիրները, մասնավորապես՝ Սիրիայի, Պաղեստինի եւ Եմենի ժողովուրդների խնդիրները խաղաղ ճանապարհով կլուծվեն:

Թուրքիայի ԱԳ նախարարն, իր կողմից, նշել է, որ Թեհրանը, Անկարան եւ Բաքուն հանդես են գալիս տարածաշրջանային հարցերում միակողմանի միջոցառումների դեմ եւ կարծում են, որ այս կապակցությամբ պետք է ընդունվեն ընդհանուր եւ բազմակողմ որոշումներ:

Երեք երկրները համաձայնվել են, որ տարածաշրջանային խնդիրները պետք է լուծվեն խաղաղ ճանապարհով եւ երկխոսության միջոցով, հավելել է նա: Չավուշօղլուն կոչ է արել համատեղ համագործակցությունը շարունակել տարածաշրջանում կայունությանը, խաղաղությանը եւ անվտանգությանը նպաստելու համար եւ ասել, որ եռակողմ տնտեսական հարաբերությունները նույնպես կհամապատասխանեն տարածաշրջանային բոլոր պետություններին շահերին:

Նրա խոսքով՝ Թուրքիան շարունակում է Իրանի հետ համագործակցությունը 2015 թվականի միջուկային համաձայնագրից ԱՄՆ-ի դուրս գալուց հետո: Նա հայտնել է, որ Թուրքիան եվրոպական երկրների հետ խորհրդակցություններ անցկացնում Իրանի հետ համագործակցությունը շարունակելու հարցի շուրջ: