Իսպանիայի թագուհին «մեկնաբանել» է սկեսրոջ հետ տհաճ միջադեպը (տեսանյութ)

Իսպանիայի թագուհի Լետիսիան մտերիմ ընկերուհու միջոցով արձագանքել է երեկ համացանցում լայն տարածում գտած ու բուռն քննարկումների առիթ տված տեսանյութին, որը խոսում է թագուհու ու սկեսրոջ լարված փոխհարաբերությունների մասին:

Ինչպես նշում է The Daily Mail-ը, ընկերուհու՝ Իմա Ագուիլարի խոսքով՝ 45-ամյա Լետիսիան ասել է, որ շատ է վշտացել՝ տեսնելով, թե այդ տեսանյութն ինչ իրարանցում է առաջացրել:

Նա բացատրել է, որ թագուհին ընդամենը չէր ցանկանում, որ մեդիայի ներկայացուցիչները լուսանկարեն իր դուստրերին՝ արքայադուստրեր Լեոնորին ու Սոֆիային:

Հիշեցնենք, որ Սուրբ Հարության տոնին նվիրված եկեղեցական պատարագից հետո Մայորկայի Պալմա տաճարում արված տեսանյութում երևում է՝ ինչպես է թագավորի մայրը՝ 79-ամյա Սոֆիան, հպարտ ձեռքերը դնում իր երկու թոռնուհիների ուսերին ու կեցվածք ընդունում նրանց հետ լուսանկարվելու համար:

Այդ ընթացքում նրանց առջև է կանգնում թագուհի Լետիսիան ու անընդհատ այսուայն կողմ շարժվում՝ թույլ չտալով սկեսրոջը լուսանկարվել իր երեխաների հետ:

Հետո թագուհին փորձում է ավագ դստեր ուսից հեռացնել 79-ամյա Սոֆիայի ձեռքը, որն իր հերթին հրում է հարսի ձեռքը: Այդ պահին միջամտում է Իսպանիայի թագավոր Ֆելիպեն, որը մոտենում է կնոջն ու ինչ-որ բան ասում: Այդ ընթացքում թագավորի հայրը՝ 2014թ. գահից հրաժարված Խուան Կառլոսը, զարմացած նայում է երկու կանանց:

Տհաճ միջադեպին արձագանքել է Հունաստանի արքայադուստր Մարի Շանտալը, որի ամուսինը՝ թագաժառանգ արքայազն Պավլոսը, Ֆելիպե թագավորի զարմիկն է:

Նա իր թվիթերյան էջում գրել է, որ աշխարհում ոչ մի տատիկ նման վերաբերմունքի արժանի չէ:

«Այժմ նա ցույց տվեց իր իրական դեմքը (նկատի ունի թագուհի Լետիսիային):Ի՞նչ է այս մասին գրում իսպանական մամուլը: Սա ուղղակի ահավոր է»,-մեկ այլ թվիթում գրել է Մարի Շանտալը: