Մոսկվայում «մսագործ»-վիրաբույժ ադրբեջանցին հաշմել է կանանց. քրեական գործի քննությունը հայ է վարում

Ռուսաստանի իրավապահ մարմինները՝ քննիչ Գարի Հովհաննիսյանի ղեկավարությամբ քննում են ադրբեջանցի պլաստիկ «մսագործ»-վիրաբույժի գործունեությունը, որի զոհն էին դարձել տասնյակից ավելի հիվանդներ, որոնք «բժշկին» էին վստահել իրենց կյանքն ու առողջությունը, հայտնում է «Կոմսոմոլսկայա պրավդան»:

Ադրբեջանի քաղաքացի Էլչին Վելիօղլու Մամեդովը սկսել է վիրահատություններ կատարել դեռեւս 2000-ականների կեսից: Դեռ 10 տարի առաջ Մամեդովը «Մուզ ԹՎ»-ի աստղն էր, Ելենա Մալիշեւայի հետ նկարահանվում էր «Սարսափելի գեղեցիկ» հեռուստահաղորդման մեջ: Հռչակվել էր պլաստիկ վիրաբուժության նորաձեւ գուրու:

Իսկ 2010 թվականին «Ռոսզդրավնադզորի» պաշտոնատար անձինք Մամեդովին, չնայած Ռուսաստանում բժշկական կրթությունը հաստատող փաստաթղթերի բացակայությանը, ուղեգիր էին տվել «վիրաբուժություն» մասնագիտությամբ քննություն հանձնելու: Նա 3 էր ստացել եւ շարունակել աշխատել:

2012 թվականին վիրաբույժը դարձել էր ոչ միայն Ռուսաստանի քաղաքացի, այլեւ Մոսկվայում 2 կլինիկաների հիմնադիր: Արդեն այդ ժամանակ Մամեդովի ձեռքով մահացել եւ տուժել էին մի քանի կանայք:

Իսկ 2012 թվականին խուզարկությամբ առգրավվել էին Մամեդովի բժշկական փաստաթղթերը, որոնք փորձաքննությամբ կեղծ էին ճանաչվել:

Այնուհետեւ պարզվել էր, որ կանանց վիրահատել է մանկաբույժի ադրբեջանական դիպլոմով մարդը: Իսկ դիմածնոտային վիրաբույժի ռուսական հավաստագիրը կեղծված էր:

2010 թվականին «Կոմսոմոլկան» օգնության է դիմել Ռուսաստանի Քննչական կոմիտեի ղեկավար Ալեսանդր Բաստրիկինին, եւ նա Մամեդովի գործը հանձնարարել է փորձառու քննիչ Գարի Հովհաննիսյանին:

«Ներկայումս գործը մերթ կասեցվում է, մերթ մեր ուժերով վերաբացվում: Մամեդովի պաշտպանական կողմը իմ եւ Ռուսաստանի փորձագիտական հաստատությունների դեմ բողոքներ է ներկայացնում: Բանն այն է, որ Մամեդովն ունի ե՛ւ Ադրբեջանի, ե՛ւ Ռուսաստանի քաղաքացիություն: Մենք խնդրել ենք նրան հանձնել: Մեզ մերժել են՝ առաջարկելով նրա գործը փոխանցել Ադրբեջան: Եվ մենք «ոչ» ասացինք: Արդեն թրծված ենք՝ հայրենիքում հանցագործների քրեական գործերն արագ փլուզվում են»,- նշել է Հովհաննիսյանը:

Ադրբեջանական լրատվամիջոցները բազմիցս գրել են, որ Ռուսաստանում Մամեդովի գործը հայ է վարում, ուստի նա հետապնդվում է ազգային հողի վրա: Մամեդովին դեռեւս չի հաջողվում «վերցնել», եւ նրան հեռակա են դատում: Վիրաբույժը, փաստորեն, Ադրբեջանում փակված է, որի սահմաններից դուրս կձերբակալվի Ինտերպոլի կողմից:

Ինչ վերաբերում է Մոսկվայում կլինիկաներին, ապա դեռեւս 2015 թվականին մոսկովյան կլինիկաների շենքերի վրա կալանք է դրված: Սակայն պարզվել է, որ այնտեղից վերցնելու առանձնապես ոչ մի բան չկա. Մամեդովը միությունում բաժնեմաս ունի, սակայն այն խորհրդանշական է:

Հայտնի է նաեւ, որ 2014 թվականին Էլչին Մամեդովը հեռացվել է Բաքվի Caspian Clinic Hospital կլինիկայից: Հիմա նա աշխատում է Ադրբեջանի ժողովրդական արտիստ Լեյլա Շիխլինսկայայի կլինիկայում: Այնտեղ ընթացիկ տարում արդեն սկանդալ է ծագել աշխատակիցների կողմից հիվանդների փողերի յուրացման գործով: