Սկրիպալներին կարող են թունավորած լինել Ռուսաստանից բերված հնդկաձավարով. Սքոթլանդ Յարդ

Մեծ Բրիտանիայի ոստիկանությունը չի բացառել, որ Միացյալ Թագավորությունում բնակվող ռուս նախկին լրտես Սերգեյ Սկրիպալն ու նրա դուստրը կարող են թունավորված լինել Ռուսաստանից բերված հնդկաձավարի միջոցով, գրում է The Daily Star-ը:

Իրավապահները նման տեսակետի են հանգել, երբ տեղեկացել են, որ Սկրիպալն իր 33-ամյա դստերը՝ Յուլյային, խնդրել էր իր հետ Մոսկվայից հնդկաձավար, ինչպես նաև որոշ համեմունքներ բերել:

Յուլյան մոռացել էր այդ ամենն իր հետ տանել ու խնդրել էր Մոսկվայից Լոնդոն մեկնող մի ծանոթ կնոջ իր հետ մի տուփ հնդկաձավար բերել: Ենթադրվում է, որ խորհրդային արտադրության «Նովիչոկ» նյարդապարալիտիկ նյութը գտնվել է հենց այդ տուփում:

Հայտնի է, որ Սքոթլանդ Յարդն արդեն հարցաքննել է հնդկաձավարը բերած կնոջը, որը Ռուսաստանում աշխատում է բժշկական խոշոր ընկերությունում:

Մարտի 4-ին հայր և դուստր Սկրիպալներին թունավորված են հայտնաբերել բրիտանական Սոլսբերի քաղաքում: Պաշտոնական Լոնդոնն ու նրա դաշնակիցները կատարվածի համար մեղադրում են Մոսկվային: Ստեղծված իրավիճակի ֆոնին մի քանի տասնյակ պետությունից արտաքսվել է մոտ 100 ռուս դիվանագետ: Դրան ի պատասխան Մոսկվան արտաքսել է իր երկրում գտնվող օտարերկրյա դիվանագետների մի մասին: Ռուսաստանի Դաշնության նախագահի մամուլի խոսնակ Դմիտրի Պեսկովը հայտարարել է, որ Լոնդոնը Սկրիպալի գործով Մոսկվային մեղադրելու համար բավարար ապացույցներ չունի:

Հավելենք, որ Յուլյա Սկրիպալը գիտակցության է եկել, սակայն նրա հոր վիճակը շարունակում է ծայրահեղ ծանր մնալ:

Հիշեցնենք, որ Սերգեյ Սկրիպալը Ռուսաստանում 2006 թվականին դատապարտվել էր Մեծ Բրիտանիայի օգտին լրտեսելու համար, իսկ 2010 թվականին նրան ներում է շնորհվել երեք այլ ռուսների հետ: Ավելի ուշ նրանց փոխանակել են ԱՄՆ-ում ձերբակալված ռուս գործակալների հետ: Սկրիպալն ապաստան էր ստացել Մեծ Բրիտանիայում:

Այս թեմայով Սկրիպալներին «թունավորողին» նկատել են ՌԴ գլխավոր հետախուզական վարչության գեներալի դստեր հարսանիքին (լուսանկար) Սերգեյ Սկրիպալը թունավորման դեպքից հետո առաջին անգամ զանգահարել է հարազատներին Սկրիպալների գործով ԱՄՆ-ն նոր պատժամիջոցներ է պատրաստում Ռուսաստանի դեմ Վիկտորյա Սկրիպալը պատմել է «տառապանքների տարվա» մասին Սերգեյ Սկրիպալի առողջական վիճակը վատացել է