Դիվանագիտական սկանդալ Մեծ Բրիտանիայի ու ՌԴ-ի միջեւ. Մեծ Բրիտանիան արտաքսել է 23 ռուս դիվանագետի և չեղարկել ՌԴ-ի հետ կնքված պայմանագրերը

Մեծ Բրիտանիայի վարչապետ Թերեզա Մեյը հայտարարել է 23 ռուս դիվանագետի արտաքսելու մասին՝ ռուսական հետախուզական վարչության նախկին աշխատակից Սերգեյ Սկրիպալի և նրա դստեր թունավորման առնչությամբ: Այդ մասին Մեծ Բրիտանիայի վարչապետը հայտարարել է խորհրդարանում ելույթի ժամանակ, հաղորդում է The Guardian-ը:

Նա հստակեցրել է, որ դիվանագետներին մեկ շաբաթ է տրվում երկրից հեռանալու համար: Դա դիվանագետների ամենամեծ արտաքսումն է ավելի քան 30 տարվա ընթացքում:

Թերեզա Մեյի խոսքով՝ դիվանագետները ռուսական գաղտնի հետախուզության աշխատակիցներ են:

Նա հայտարարել է նաև Ռուսաստանի հետ բարձր մակարդակով կնքված պայմանագրերի չեղարկման մասին: Չեղարկվել է Մեծ Բրիտանիա այցելելու համար Ռուսաստանի արտգործնախարար Սերգեյ Լավրովին ուղարկված հրավերը: Նա նաև հայտնել է, որ բրիտանացի նախարարները և բարձրաստիճան պաշտոնյաները չեն այցելի Ռուսաստանում կայանալիք Ֆուտբոլի աշխարհի առաջնությանը:

Մեյը հավելել է, որ կարող են ձեռնարկվել նաև այլ քայլեր, որոնք չեն հրապարակվի:

Նա «ողբերգական» է անվանել ՌԴ նախագահ Վլադիմիր Պուտինի որոշումը՝ գործել նման կերպ:

Ավելի վաղ հաղորդվել է, որ Մեծ Բրիտանիայի արտգործնախարարությունը հայտնել է ՄԱԿ-ի Անվտանգության խորհրդի արտահերթ նիստ հրավիրելու մասին:

Ավելի վաղ ՌԴ ԱԳ նախարար Սերգեյ Լավրովը հայտարարել է, որ ռուսական կողմը չի պատասխանի «Սկրիպալի գործի» վերաբերյալ Լոնդոնի վերջնագրին, մինչև Մեծ Բրիտանիան չկատարի քիմիական զենքի արգելման մասին հռչակագրի շրջանակում ստանձնած պարտավորությունները և չապահովի նյութին հասանելիությունը, որով թունավորվել են ռուս նախկին սպա Սերգեյ Սկրիպալը և նրա դուստր Յուլյան:

Մարտի 12-ին Մեծ Բրիտանիայի վարչապետ Թերեզա Մեյը հայտարարել էր, որ Սկրիպալի թունավորմանը «մեծ հավանականությամբ» ներգրավված է Ռուսաստանը: Նա ՌԴ-ին ժամանակ էր տվել մինչև մարտի 13-ը միջադեպի առնչությամբ մանրամասն պարզաբանումներ տրամադրելու համար, հակառակ դեպքում՝ Մոսկվայի դեմ լուրջ քայլերի ձեռնարկում է նախատեսվում:

Հիշեցնենք, որ 66-ամյա նախկին լրտես Սկրիպալը և նրա դուստրը մարտի 4-ին նյարդապարալիտիկ գազի ազդեցության են ենթարկվել անգլիական Սոլսբերի քաղաքի առևտրի կենտրոններից մեկում և անգիտակից վիճակում տեղափոխվել հիվանդանոց։ Նրանք գտնվում են հիվանդանոցում ծայրահեղ ծանր վիճակում:

Սկրիպալը Ռուսաստանում 2006 թվականին դատապարտվել էր Մեծ Բրիտանիայի օգտին լրտեսելու համար, իսկ 2010 թվականին նրան ներում է շնորհվել երեք այլ ռուսների հետ: Ավելի ուշ նրանց փոխանակել են ԱՄՆ-ում ձերբակալված ռուս գործակալների հետ: Սկրիպալն ապաստան էր ստացել Մեծ Բրիտանիայում: