Ֆիլիպինների իշխանությունները ավելի քան 1 մլն դոլարի թանկարժեք մեքենաներ են ոչնչացրել

Ֆիլիպինների իշխանությունները անցյալ տարի մաքսային ծառայության կողմից բռնագրավված երկու տասնյակ թանկարժեք մեքենաներ են ոչնչացրել: Բուլդոզերների միջոցով մետաղի կույտ դարձած ավտոմեքենաների թվում են եղել Lexus, BMW, Mercedes-Benz, Audi, Jaguar եւ Chevrolet Corvette Stingray մեքենաները: Այսպիսով, երկրի նախագահ Ռոդրիգո Դուտերտեն իր վերաբերմունքն է արտահայտել հանցագործության եւ կոռուպցիայի նկատմամբ, հաղորդում է Reuters-ը:

Մաքսային հսկողության բյուրոյի ստեղծման 116-ամյակի տոնակատարության ժամանակ ոչնչացված ավտոմեքենաների ընդհանուր արժեքը կազմել է 1.2 մլն դոլար:

«Նրանց համար, ովքեր փորձում են հարկերից խուսափել պաշտոնյաներին կաշառելու միջոցով, մենք ուզում ենք ասել մի բան, դուք հաջողություն չեք ունենա», - ասել է Ֆիլիպինների ֆինանսների նախարար Կարլոս Դոմինգեսը: