Երուսաղեմի Հին քաղաքում սրբավայրերի նկատմամբ պղծման կասկածանքով 7 մարդ է ձերբակալվել

Իսրայելի ոստիկանությունը հայտնել է, որ Երուսաղեմի Հին քաղաքում 7 մարդ է ձերբակալվել քրիստոնեական և մահմեդական սրբավայրերի նկատմամբ պղծման գործողություններ կատարելու կասկածանքով, հաղորդում է The Times of Israel-ը։

Ոստիկանության տվյալներով՝ կասկածյալներից 4-ը ձերբակալվել են այն պահին, երբ, ենթադրաբար, թքում էին Երուսաղեմի Հայոց պատրիարքարանի համալիրի ուղղությամբ։ Եվս 3 չափահաս անձ ձերբակալվել է մահմեդական գերեզմաններ վնասելու կասկածանքով։ 

Ոստիկանության հրապարակած տեսանյութում երևում է, թե ինչպես են 3 անձ մոտենում մահմեդական գերեզմանաքարին, հարվածում դրան, ապա նրանցից մեկը ձեռքերով տապալում է այն։ 

7 կասկածյալներն էլ հարցաքննվել են հասարակական անվտանգությանը վնաս հասցնելու հնարավոր վարքագծի կասկածանքով, որից հետո ազատ են արձակվել սահմանափակող պայմաններով։

Իսրայելի ոստիկանությունը հայտարարել է, որ Երուսաղեմի Հին քաղաքում շարունակում է միջոցներ ձեռնարկել հոգևորականների, կրոնական հաստատությունների և գերեզմանատների նկատմամբ ոտնձգությունների դեմ։ 

Ավելի վաղ 6 անձ, որոնցից 5-ը անչափահաս, ձերբակալվել էր Երուսաղեմի հայկական թաղամասում Սուրբ Հակոբյանց վանքի մուտքի մոտ թքելու և քարեր նետելու կասկածանքով։