Կանցկացվի Գրքի երևանյան միջազգային 9-րդ փառատոնը

Երևանի քաղաքապետարանի գլխավոր հովանավորությամբ սեպտեմբերի 4-6-ը Հանրապետության հրապարակում կանցկացվի Գրքի երևանյան միջազգային 9-րդ փառատոնը։ Ծրագրում ընդգրկված է 54 միջոցառում. մասնակցում են գրողներ և հրատարակիչներ 13 երկրից:

Գրքի երևանյան 9-րդ փառատոնի թեման լեզուն է՝ որպես քաղաքակրթության հիշողությունն ամբարող և փոխանցող միակ երևույթ։ Ցուցահանդես-տոնավաճառին մասնակցող շուրջ 60 կազմակերպություններ գրքերը վաճառելու են 20-40% զեղչով:

Փառատոնի բացման արարողությունը տեղի կունենա սեպտեմբերի 4-ին՝ ժամը 19:00-ին, Հայաստանի ազգային պատկերասրահի Որմնանկարների սրահում, իսկ փակման արարողությունը և գրական մրցանակաբաշխությունը՝ նույն վայրում՝ սեպտեմբերի 6-ին՝ ժամը 20:00-ին: Այդ օրը հայտնի կդառնան հանրապետական գրական մրցույթի հաղթողների անունները: 

Մրցույթին ներկայացվել է 455 հայտ, որից հաստատվել է 205-ը: