Իրանը ցանկանում է պատժել Հորմուզով անցնող օրինախախտ նավերին

Իրանը շեշտում է, որ Հորմուզի նեղուցով անցնելու կանոնները խախտող նավերը կենթարկվեն սահմանափակումների հետագա անցումների ժամանակ, ներառյալ տուգանքներ, կալանում և հնարավոր բռնագրավում։ Այս մասին սոցիալական ցանցերում հայտարարել է Իրանի Պարսից ծոցի նեղուցի վարչությունը (PGSA):

Պարսից ծոցից կամ դեպի Ծոց փոխադրումներ իրականացնող բեռնափոխադրողները պետք է նախապես ծանոթանան սահմանված պահանջներին չհամապատասխանող նավերի ցանկին՝ հնարավոր խնդիրներից խուսափելու համար, ասվում է հայտարարության մեջ:

Ավելի վաղ՝ օգոստոսի 19-ին, Axios-ը հայտնել էր, որ ԱՄՆ զինված ուժերը գաղտնի ծովային երթուղի են գծել Հորմուզի նեղուցով նավերի անցման համար, որը թույլ է տալիս օրական միլիոնավոր բարել նավթ տեղափոխել:

Պարբերականի տվյալներով՝ Օմանի ափերի մոտով ամեն գիշեր անցնում է 15-20 լցանավ, որոնք համաշխարհային շուկա են մատակարարում մոտ 10 մլն բարել նավթ՝ նախապատերազմյան ծավալի մոտ կեսը: Ինչպես պնդում են ԱՄՆ նախագահի վարչակազմի պաշտոնյաները, մատակարարումները «զգալի ազդեցություն» ունեն նավթի համաշխարհային շուկայի վրա:

Մինչ այդ նախագահ Թրամփը հայտարարել էր Իրանի դեմ խոշոր տնտեսական պատերազմ սկսելու մասին։ Նա սպառնացել էր «հսկայական» պատժամիջոցներ կիրառել Թեհրանին աջակցող կամ նրա հետ գործակցող ցանկացած երկրի նկատմամբ։ Թրամփը նաև ընդգծել է, որ Վաշինգտոնը ներկայումս բանակցություններ չի վարում Թեհրանի հետ։