«Կարոտում եմ նախկին աշխատանքս». Օբամա

ԱՄՆ նախկին նախագահ Բարաք Օբաման պատմել է, որ նախագահի պաշտոնը լքելուց հետո ուրախանում է լավ քնելու և իր օրն ամբողջությամբ վերահսկելու հնարավորությամբ: Այս մասին նա ասել է Մեծ Բրիտանիայի արքայազն Հարիին տված հարցազրույցում, հաղորդում է BBC News-ը:

«Ես ավելի ուշ եմ արթնանում: Եվ, իհարկե, հրաշալի է օրն ամբողջությամբ վերահսկելու հնարավորություն ունենալը, ինչը ես չունեի նախագահ լինելու ժամանակ: Այն ժամանակ ես… խիտ ժամանակացույց ունեի: Այժմ ես արթնանում եմ, որոշում կայացնում՝ ինչպես եմ ուզում անցկացնել ժամանակը և ինչ պետք է անեմ: Ես ազատ եմ զգում ինձ: Եվ արդեն ինչ-որ հարցերում խորանալու հնարավորություն ունեմ», - ասել է նա:

Նախկին նախագահի խոսքով՝ այժմ ինքը կարող է արթնանալ և 45 րոպե խոսել իր կնոջ հետ, այնուհետև կարող է թույլ տալ իրեն երկար նախաճաշել և արդեն դրանից հետո անցնել գործերին:

Օբաման նաև նշել է, որ իր կյանքը շատ է փոխվել պաշտոնը լքելուց հետո: Առաջին հերթին, փոփոխություններն անդրադարձել են իր աշխատանքային ժամանակացույցի վրա, սակայն դրա հետ մեկտեղ ինքը շարունակում է մտածել երկրի և քաղաքացիների ապագայի մասին:

«Ինձ համար շատ բան է փոխվել, սակայն ես շարունակում եմ մտածել կարևոր հարցերի շուրջ. կցանկանայի համոզված լինել, որ Միացյալ Նահանգները զարգանում են և պահպանում իրենց տեղն աշխարհում: Ես կցանկանայի, որ երեխաները կրթության հնարավորություն ունենան, որ բոլորը, ովքեր ունեն դրա կարիքը, աշխատանք գտնեն և արժանապատիվ վարձատրություն ստանան: Իհարկե, այժմ չունեմ այն գործիքները, որոնք եղել են իմ տրամադրության տակ նախագահության տարիներին: Սակայն այժմ շատ բան է բարձրացնում իմ մոտիվացիան», - ասել է նա:

Օբաման խոստովանել է, որ ինքը կարոտում է իր նախկին աշխատանքը և մասնագետների թիմը, որի հետ աշխատել է Սպիտակ տանը:

«Ամենաշատը կարոտում եմ իմ թիվը, այն պակասում է ինձ: Նաև պակասում է ինտենսիվությունն աշխատանքում, երբ գիտեիր, որ ամեն օր հարցեր լուծելով ինչ-որ բան ես արել մարդկանց համար: Եվ իհարկե, ես կարոտում եմ այն աշխատանքը», - խոստովանել է նա: